Kahugot sa pagtuo makaisog

Nagkaanam nag kadaghan ang nasod nga nasudlan og coronavirus (covid-19). Niining bag-o mao ang Italy, Iran ug South Korea.

Libo ka libo ang nangatakdan ug ubay-ubay nang nangamatay:  12 sa Iran, 8 sa South Korea ug 6 sa Italy.

Base sa langyawng mantalaan, nagkadaghan ang natakboyan sa South Korea, diin sa adlawng Lunes (sa ilaha), may 231 ka kasong nadiskobrehan nga nakapasaka sa nangatakdan ngadto sa 833, walay labot sa 11,600 kapin nga padayon pang gieksamin ug giobserbaran.

Hinungdan, nga hangtod karon, halin kaayo ang mga face/surgical masks.

Apan tungod lagi sa law of supply and demand, mas mimahal ang presyo niini kon ikumpara sa kaniadto nga matagbaw intawon ang botika pagpamaspas sa giabogan nilang old stocks.

Usa ka batan-ong maestra, kinsa kasamatangang nag-VIP bar attendant samtang nagpaabot nga kahatagag assignment slot sa Department of Education (DepEd) hopefully next year, akong gipangutana nganong di siya magsul-ob og face mask ug unsay iyang opiniyon bahin ning pag-usab sa simbahan sa naandang praktis sa Ash Wednesday, diin dili na ibadlis ang abo sa agtang, kondili, isabod na lang sa ulo.

Ania iyang tubag: “Tropical country man ta, Sir. Dili molahutayg dugay ang virus. Mamatay man kinig init.

Ug bahin sa pag-sprinkle na lang sa abo ibabaw sa ulo on Ash Wednesday, lainan ko.

Kay nagpakita lang, nga hasta kaparian nahadlok ning paghasmag sa gumonhap ning atong kinabuhi. Nga unta, anaa man pirme ang Ginoo sa atong kasingkasing.

Andam manalipod nato kanunay batok sa mga daotan. Kana kon hugot ang imong pagtuo sama sa akoa. Perog lugak?”

Sa iyang pamahayag, nahinumdom hinuon ko sa ebanghelyo. Niadtong sakay sa bangka, gikauban sa mga apostoles si Hesus.

Pag-abot sa lawod, miunos ug midagko ang mga balod nga mipatuyatuyag maayo sa ilang gisakyan. Nahadlok ang mga tinun-an nga malunod. Busa, gipukaw nila si Hesus nga natulog.

Ug gihangyo nga luwason sila. Tuod, gipahunong ni Hesus ang unos ug gipahinay ang mga balod.

Apan may gisulti Siya: “Pagkamabaw sa inyong pagtuo. Ania man unta Ko uban ninyo, unya  kamo nalisang.”

Sakita paminawon, sa? Mao nga nakaingon ko: “May punto si titser sa iyang pag-ila ni Kristo, kinsa atong Manluluwas.”