Carbon market panindoton
RENBOR PATROL - Rene U. Borromeo (Banat) - February 27, 2020 - 12:00am

Kon ako ang pahukmon, nindot gyud nga itugyan na lang sa private investor ang pagtukod ug bag-ong Carbon Public Market building aron nga matubag na ang dugay kaayong yangungo sa mga market vendors.

Ang Megawide, ang kompaniya nga nagdumala karon sa Mactan Cebu International Airport, mitanyag ngadto sa kagamhanan sa Dakbayan sa Sugbo nga sila maoy mo-develop sa Carbon Market.

Para nako, mas maayo nga dawaton na lang sa mga opisyal sa dakbayan sa Sugbo ang maong tanyag sa Megawide kay, sus, 32 ka tuig na gikan sa pagkasunog sa Carbon Market Unit 2 building, apan hangtud karon wala gyud sila makapatukod.

Tiaw mo nga 1998 pa nga nasunog ang Unit 2 sa Carbon Market apan hangtud karon wala gyud makapatukod pagbalik og building ang mga opisyal sa siyudad? Nagpulipuli na lang ang mayor, apan pareho sila nga pakyas sa pagpatukod og bag-ong building.

Bag-o pa ko nga reporter kaniadto diha nga nasunog ang Carbon Market Unit 2 building, ug usa ko nga mi-cover sa maong sunog. Panahon pa kadto sa administrasyon ni kanhi mayor Alvin Garcia.

Gikontrata ni Alvin ang Young Builders nga maoy motukod og bag-o nga market building, apan igo ra man nakapabarug og haligi dihang gipilde siya ni Tomas Osmeña sa eleksyon niadtong 2001.

Wala idayon ni Osmeña ang kontrata kay gusto niya nga usbon ang desinyo nga ang ibabaw niini mahimong kaparkingan og sakyanan, ilabi na ang mga mag-deliver og mga baligya.

Apan nakalingkod na lang og siyam ka tuig pagkamayor si Tommy, wala gyud siya makapatukod. Mibanos si Mike Rama pagka mayor niadtong 2010, ug mikontrata sa usa ka Manila-based contractor, apan wala gihapon makadayon kay gikiha ni Tommy si Mike kay illegal kuno ang pag-hire sa maong kontraktor.

Gikan 2010 hangtud sa 2016, wala gyud makapatukod og bag-ong market building si Rama. Mibalik si Tommy pagka mayor niadtong 2016, apan napupos na lang ang tulo ka tuig niyang termino, wala gihapon siya makapatukod og building. Karon, administrasyon na ni Mayor Edgar Labella, ang mga vendors nag-ampo nga matuman na ang ilang dugay’ng gipangandoy.

Apan awhagon nako ang mga opisyal nga konsultaha ninyo ang pangulo sa kahugpongan sa mga vendors. Paminawa usab ang ilang mga hunahuna kabahin niini.

Sayod ko nga si Erwin Gok-ong nga maoy chairman sa Cebu Market Vendors Cooperative (CEMVEDCO), daghan og mga maayong inputs kabahin niining maong isyu.

Ang uban ra ba diha nga opisyal sa City Hall dili ganahan nga mokunsulta ni Gok-ong kay nagtoo sila nga ila kining kontra sa politika nga dili ra ba gyud tinuod.

CARBON MARKET
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with