Mas mahinungdanon kay sa lalis angay na bang ideklarar ang pandemic sa Covid-19 mao ang pagpaminaw sa Pilipinas ug ubang kanasuran sa kalibotan sa tambag sa World Health Organization (WHO) sa labing dinalian nga panginahanglan sa pagpangandam sa kahigayonan nga mokatap ang kagaw sa mas daghang kanasuran ug makatakod sa mas daghang katawhan.
Sakto si Dr. Tedros Adhanom Ghebreyesus, direktor heneral sa WHO, nga di makasagang sa pagtakboy sa kagaw ang dinalidali nga pagdeklarar og pandemic, nga nanukad sa pagtuo nga ang tanang katawhan sa tanang suok sa kalibotan mahimong matakdan ug masakit. Nisugyot siya nga mas mapuslanon ang pagtinabangay.
* * *
Yano ang mga giya nga giluwatan sa WHO unsa ang labing tukma nga mga pangandam sa kahigayonan nga nakasud na ang kagaw sa nagkalainlaing kanasuran:
• Una, angayng mangandam sa pagpaniid ug pag-ila sa mga kaso sa Covid-19 sa labing dali nga panahon;
• Ikaduha, angayng mangandam sa pagtambal gilayon sa mga pasyente nga matino nga matakdan sa Covid-19;
• Ikatulo, angayng mangandam sa pagsubay sa tanang nakaduol sa mga pasyente nga natakdan; ug
• Ikaupat, angayng mangandam sa pagpatuman gilayon og mga lagda aron nga di mokatap sa ubang dapit ug makatakod sa mas daghang katawhan ang motumaw nga mga kaso sa Covid-19.
* * *
Nikumpisal ang WHO nga hangtod karon wa pa sila makasabot giunsa pagkatap sa mga kaso sa Covid-19 sa sud ug sa gawas sa China. Samtang nitidlom nang gidaghanon sa bag-ong mga kaso sa mainland China sa niaging mga adlaw, nagsugod na sab pagsulbong ang bag-ong mga kaso sa South Korea, Italya ug Iran.
Maong sayo pa alang sa China ang pagdeklarar og pasiunang kadaogan batok sa Covid-19. Sama nga sayo pa sab ang pagdeklarar nga di na kapugngan ang pagsulbong sa mga kaso ug mas paspas nga pagkatap sa kagaw sa uban pang kanasuran.
* * *
Gipasidan-an sa WHO ang mga nasud nga nilugak na sa ilang panagang sa kagaw. Ang tanang kanasuran mahimong masudlan sa kagaw kay ang tanang kanasuran dunay:
• Katawhan nga hamtong, dunay mga sakit ug busa mas daling mataptan kon mokatap ang kagaw; ug
• Ang health systems bisan sa labing adunahang mga nasud di takos pag-atiman sa posibleng pagbaha sa mas daghang pasyente.
* * *