Ang quarantine

Gipapangayo og public apology sa kagamhanan sa lalawigan sa Sugbo ang usa ka opisyal sa barangay dinhi sa dakbayan sa Sugbo tungod sa pagpanguna sa mga nagreklamo tungod sa pag-quarantine kanila human sila miabot gikan sa Taiwan.

Ang Taiwan usa sa mga nasud nga gipaubos sa nasudnong kagamhanan sa travel ban tungod sa kaso sa Coronavirus Disease 19 o COVID-19.

Mokabat sa 14 ka kaadlaw nga quarantine sa mga nakabiyahi sa mga dapit nga adunay kaso sa COVID-19 gituyo aron makalikay ang Pilipinas sa nahisgotang virus nga mipatay na og dul-an duha ka libo ka mga Insik.

Ang mga eksperto sa medisina nagkanayon nga ang virus aduna kini 14 ka adlaw nga incubation period busa kun makalusot ang usa ka tawo sa maong gidugayon nga siya gi-quarantine luwas na kini sa virus.

Agi og pagtabang sa nasudnong kagamhanan, ang kagamhanan sa lalawigan sa Sugbo mitanyag sa pasilidad niini aron magamit nga quarantine site. Apan wala makauyon niini ang mga gi-quarantine maong mitumaw ang mainit nga lalis ug lantugi.

Pero epektibo ba ang pag-quarantine sa mga gikan sa nasud nga adunay COVID-19? Nakapangutana ko niini tungod kay ang balita nagkanayon nga natarantar karon ang mga opisyal sa nasud sa Cambodia human nagpositibo sa Coronavirus Disease ang pasahero nga babaye sa usa ka cruise ship nga midunggo sa ilang pantalan bisan pa man og nakapasar na kini sa 14 ka adlaw diin siya gi-quarantine.

Ang otoridad sa Cambodia natagbaw karon sa pagpangita o pagsubay sa gatosan ka mga pasahero nga kauban sa pasahero sa cruise ship nga nagpositibo sa COVID-19.

Nabalaka karon ang kanasuran sa kalibotan nga may kaso sa COVID- 19 kun unsa ang tukmang lakang nga ilang himuon aron mapugngan ang pagkuyanap sa COVID-19.

Kun mao man ugaling kini, morag mosamot na gayod ang atong kabalaka.