Tungod ug alang sa China
Ang kakalit sa pagpahamtang og travel ban sa pamunoan ni Presidente Rodrigo Duterte batok sa Taiwan naambasan lang sa kakalit sab sa paglibkas ini. Labing uwahi ning ebidensiya nga kasagaran sa mga lakang sa nasudnong liderato gihimo pinasikad sa:
Bisan unsa lay mahunahunaan sa presidente, o sa bisan unsa lay ihunghong sa iyang mga sinaligan;
Sa way pagkonsulta sa hingtungdan nga mga buhatan sa kagamhanan ug ubang sektor sa katilingban, ni sa pagsusi sa kinatibuk-an nga mga implikasyon; maong
Magkarakara dayon og balitok kon mosumbalik na ang wa kinahanglana nilang paghasul-hasol.
* * *
Gipahamtang sa pamunoan ni Presidente Duterte ang travel ban sa Taiwan nga may sagol panghunaw: Wa silay mahimo gawas sa pagsunod lang sa World Health Organization (WHO) nga niila sa Taiwan nga kabahin sa China ug busa angay lang ilumpong sa nahaunang travel ban batok sa mainland China, Hong Kong ug Macau.
Sa unang bahin, wa mosugyot ang WHO og travel ban. Ug dihang gilibkas nilang travel ban sa Taiwan human lang sa tulo ka adlaw, wa mausab ang baruganan sa WHO nga kabahin gihapon sa China ang Taiwan.
* * *
Ang tinuod mao nga nabalaka ang pamunoan nga ang kalitkalit nga travel ban—lahi sa ubang kanasuran nga may pipila ka adlaw nga lugway aron nga ang mga maapektahan maka-usab pa sa ilang flights—makapasuko sa Overseas Filipino Workers (OFWs) nga hingpit nga nagpaluyo ang presidente sa piniliay sa 2016.
Maong nidalidali sab ang pamunoan og pasalig nga sublion dayon angay bang isunod paglibkas ang travel ban batok sa Hong Kong ug Macau.
* * *
O tingali nahudlat sila sa pasidaan sa Taiwan nga tangtangon nang pribilehiyo nga way visa ang mga Pilipinhon. O tingali tungod lang sa pagkahurot na sa gahin sa Overseas Workers Welfare Administration (OWWA) nga P35 milyones alang sa P10,000 nga hinabang sa matag OFW nga natanggong sa travel ban.
Bisan unsa pa, hinaot nga nakaamgo na si Presidente Duterte, bisan unsa pay hunghong sa naglibot niyang mga hinanib nga ila rang panudlanan maoy gilantaw, nga di sa tanang higayon nga mohaom sa interes sa nasud ug katawhang Pilipinhon ang determinado niya nga pagtila sa lapalapa ni Presidente Xi Jinping sa China.
* * *
- Latest
