Leksiyon gikan sa nCoV

Maisip nga dakong leksiyon alang kanato ang pagkuyanap karon sa makamatay nga 2019 Novel Coronavirus Acute Respiratory Disease o nCoV ARD nga mipatay karon og gatusan ug milandig nag liboan ngadto sa hospital sa tibuok kalibotan, ilabina didto sa China.

Niining hilabihang paglampurnas sa bag-ong klase sa coronavirus, nakwestiyon karon ang kapabilidad sa atong kagamhanan, ilabina sa Department of Health, sa paningkamot niini pagsumpo sa pagkuyanap sa maong sakit sa nasud.

Dili nato ikalimod nga kulang gayud kita sa modemong kahimanan batok sa novel coronavirus. Sa pagkakaron, wala kitay igong ekipo pagkonpirma niadtong mga pasyente nga nagpakita og symptoms sa maong sakit.

Gani, nagsalig kita sa mga hi-tech nga kahimanan didto sa Australia aron pagtino kun positibo ba ang mga pasyente dinhi. Ug mokabat pa og pipila ka adlaw ang maong proseso una nato mahibaw-an ang resulta.

Aniay sentro dinhi sa nasud nga nag-specialized pagtino sa mga viral disease. Kini mao ang Research Institute for Tropical Medicine (RITM) didto sa kaulohan. Apan kulang kini sa modernong kahimanan pagpakigbatok niining maong klase sa balatian.

Panahon na nga molihok ang atong gobiyerno paghatag og prayoridad sa atong mga medical research institution. Angay lamang nga mogahin kini og dakong porsiyon sa tinuig nga budget pag-modernize niining maong mga facility.

Niining pagtumaw sa nCoV, nasurprisa kitang tanan gumikan sa kabagsik sa maong klase sa coronavirus ug ka paspas sa pagkuyanap niini. Ug wa pay tambal niini gawas lamang sa pag-obserbar sa proper hygiene.

Hinaut nga naleksiyon kita sa paglapdos ning nCoV nga nahinayak nang mikamang sa ubang kanasuran. Tungod kay dili pa kini maoy katapusan nga miigo sa kalibotan, makapaabot kita nga aduna pay mas ngilngig nga virus nga motumaw ug mopakurog kanato.