Dengue o NcoVirus, asay mas hadlok?

Nakatutok tanan karon sa gikahadlokan nga Novel Coronavirus Ncov nga halos gani mapraning na ang uban sa nerbyus kay lagi hadlok mataptan.

Headlines pirme sa mga balita, breaking kanunay sa mga social media ang coronavirus maong dili kalikayan nga makamugna gyud og panic.

Ilabi na kay ang mga health officials sa nasud ug mimso sa World Health Organization man ang magsegi og pagawas sa update sa naasoyng kagaw.

Kinsay dili mahadlok nga ang mga dapit gani sa China, ilabi na ang Wuhan City diin nag gikan sa Ncov, gi-total lockdown man o walay pagawason ug pasudlon sa naasoyng dapit.

Kong magtan-aw ka sa balita murag nagtan-aw ka sa pelikuka nga makakahadlok tungod lagi sa sakit nga daling makatakod.

Apan angayan ba gyud kita nga mopakita og ingon niini nga kalisang? Ang coronavirus walay bakuna apan pwedeng matambalan ug mahimo ra ganing maayo ra sulod sa pito ka adlaw, o mahimong dili matakboyan kon lig-on ang immune sytem.

Gipangutana nako ang DOH official kon unsa ang mas makakahadlok ang coronavirus o ang dengue, ang tubag mao ang dengue.

Tinuod gyud kay hangtod karon padayon ang pagsaka sa gidaghanon sa mga nataptan sa maog balatian ug daghan usab og nangamatay.

Basin baya og nakatutok ang attention sa coronavirus apan nataligam-an na ang ubang mga balatian nga dil gani matabang bisan magsul-ob og mask.

Bisan unsa ka lig-on ang immune system basta mapaakan og lamok nga nagdala og dengue segurado gyud nga mataboyan.

Mao kini ang dako ug padayon nga hulga sa kinabuhi nga dili angayang baliwalaon sa mga tawo ug mismo sa atong gobierno.

Maayong magpakabana ang tanan pinaagi sa pagpabilin nga Ncov-free ang atong dapit aron wala kitay angayan nga kabalak-an ug sa susamang higayon dili nato kalimtan ang mga kasamtangang balatian nga anaa ra sa atong tugkaran nga nangita lang og kahigayonan nga motapot sa katawhan.