Taphaw

Gipasalig ni Presidente Rodrigo Duterte iyang tabangan ang Sugbo pagpangita og pundo alang sa katukuran sa gikinahanglan nga mga proyekto pagsulbad sa suliran sa trapiko dinhi sa Metro Cebu. Gisugyot sa presidente himoong modelo sa Sugbo ang mga imprastraktura didto sa kaulohan sama sa sky highway ug LRT.

Praktikal ang sugyot ni Duterte tungod kay lisud na nga palapdan ang mga karsada tungod sa daghang maapektuhan ug sa ka dako sa gasto nga kinahanglanon pagbayad sa mga maapektuhan. Apan inay magpasalamat, gisaway hinuon ni Konsehal Joy Young ang presidente.

Matud ni Young, di haum nga himoong sumbanan sa Sugbo ang mga imprastraktura sa kaulohan tungod kay wala ni makasulbad sa higanteng problema sa trapiko didto.

Dili kuno makatabang pagpaluag sa trapiko ang LRT ug pagtukod og sky highway. Maoy iyang gusto nga ipadali ang katumanan sa Bus Rapid Transit (BRT) aron masulbad ang problema sa trapiko dinhi sa Sugbo.

Way dautan sa BRT ug gani alang nako mas bintaha ni kay sa kasamtangang kagang-kagang nga mga PUJ. Apan hangtud asa ug kanus-a kutob makaya sa BRT ang paspas nga pagsulbong sa gidaghanon sa mga tawo dinhi sa Sugbo?

Dili kaha nga human sa duha o tulo ka tuig dili na pud maakos sa BRT pagtubag ang panginahanglan sa transportasyon?

Dili sab mahimong patuyangan ang gidaghanon sa BRT tungod kay hagip-ot ug gagmay man ang atong kadalanan.

Busa alang nako haum ang sugyot sa presidente nga atong sagupon ang LRT o ba kaha MRT ug ang pagtukod og sky highway aron pagpaluag sa atong kadalanan.

Sayop ug taphaw ang argumento ni Young nga wala makasulbad sa trapiko sa Metro Manila and LRT ug sky highway busa di sab ni makasulbad sa problema dinhi sa Sugbo.

Atong pahinumduman si Young nga managlahi ang sitwasyon sa matag dapit.

Di niya mahimong ikumparar ang Sugbo sa kaulohan tungod kay mas dako ang ilang populasyon kon itandi sa Sugbo.

Angayan sab nga hinumduman ni Young nga di lang ang dakbayan sa Sugbo maoy magbuot unsay makaayo sa tibuok lalawigan. Ang katukuran sa LRT o MRT dinhi sa Sugbo siguradong makabenipisyo sa kalungsoran sa Metro Cebu. Kun gamiton lang ni Young ang iyang sentido kumon, mas makatabang gani ang LRT o MRT aron pagsulbad sa kahuot sa dakbayan.

Kun  dunay tarong ug efficient nga transportasyon nga magdugtong sa kalungsuran, wala na kinahanglana ang mga trabahante gikan sa kalungsuran nga mopuyo dinhi sa dakbayan.

Mamahimo na silang mopauli sa ilang panimay matag-adlaw. Sa ingon niini masulbad ang problema sa mga informal settlers dinhi sa kinapusurang bahin sa dakbayan.