Tapulan nga Ombudsman

Giawhag sa beterano ug tri-media personality Super Bobby G. Nalzaro ang Ombudsman Visayas sa pag life-style check ni Victor Caindec ang director sa Land Transportation Office (LTO) dinhi sa Central Visayas. Kini human gipasanginlan sa amahan mismo sa Director nga ang naulahi nakabaton kini og daghang sakyanan sulod lamang sa duha ka tuig niining paglingkod isip director sa LTO 7.

Ang awhag ni Super Bobby sa Ombudsman Visayas iya kining gipaagi sa sulat diin iyang giladlad ang tanan niyang nahibawan batok kang director Caindec basi sa gibulgar sa amahan niini kinsa personal nga mibutho sa sibyaanan aron ibulgar ang iyang mga nahibaw-an.

Kun unsa ang sulod sa suwat awhag mao usab kini ang gihisgotan sa beteranong tri-media personality sa iyang programa sa radyo ug gisuwat sa iyang lindog sa pamantalaan.

Apan ang Ombudsman Visayas mopaabot pa sa suwat awhag ni Super Bobby Nalzaro ngadto sa ilang ulohan nga buhatan tungod sa rason nga taas ang position ni Caindec nga gipa life-style check.

Karon pa ko ning Ombudsman Visayas. Bago nako ning gihimong lakang sa Ombudsman kay wala ni kaniadto sa dihang nag cover pa ko niining maong buhatan isip reporter kaniadto sa Bombo Radyo Cebu.

Sa panahon nila ni Deputy Ombudsman for the Visayas Arturo Mojica ug Primo Miro ang buhatan sa Visayas Ombudsman dali ra kaayo nga makahimo og imbestigasyon sa mga reklamo nga moabot sa ilang buhatan.

Bisan gani sa mga pasangil nga napatik sa mga pamantalaan, nadungog sa radyo ug nakita sa telebisyon batok sa mga opisyal ug kawani sa gobiyerno ila kining himoan og imbestigasyon bisan walay niduso og reklamo sa ilang buhatan tungod kay aduna silay gahom sa imbestigar bisan walay nagreklamo.

Ang Ombudsman Visayas adtong panahona dali ra pud makapagawas og resulta sa ilang gihimo nga imbestigasyon bisan si kinsa pa nga gamhanan nga ilang giimbestigahan. Karon maabtan ka’g siyam-siyam. Naunsa naman ni?