Maayo kining rekomendasyon ni Atty. Rey Gealon sa Cebu City Legal Office nga kinahanglang mobalik og seminar kadtong upat ka mga sakop sa Prevention, Restoration, Order, Beautification, Enhancement (PROBE) nga bayolenteng mikumpiskar sa mga baligyang prutas sa usa ka vendor.
Ang upat u gang ilang buhatan lakip na mismo ang Cebu City Hall naputos sa pagsaway diha sa social media tungod sa bayolenteng taras sa upat adtong tungora.
Ang gobiyerno dili makahimo sa mga ginbuhaton ug mga tahas niini pagserbisyo sa publiko kun wala kini mga sakop nga maoy mopatuman sa kamandoan, polisiya ug mga ordinansa.
Ang tanang kawani sa gobiyerno, regular man o job order employees kinahanglang mohimo sa ilang trabaho pinasubay propesyonalismo ug pinasubay sa balaod ug bawal ang abusado nga maoy gimando sa Section 4(b) sa Republic Act 6713 or The Code of Conduct sa tanang kawani sa gobiyerno.
Apan responsibilidad sa siyudad nga tudloan kining ilang mga tigpatuman sa ordinansa sa hustong pamaagi hasta sa hustong pamatasan isip mga frontliners. Kinahanglang nakasabot sila kun unsa ilang trabaho ug limitasyon.
Sa mga netizens nga wala makaila adtong vendor, natural maluoy gyud sa pagkakita sa iyang gidangatan gikan sa mga kamot sa mga PROBE personnel.
Gani kun buot hunahunaon kaning mga nanakop mas nakasabot pa unta sa kahimtang sa maong vendor kay nakaila naman diay sila niini kay lima ka higayon na kining nadakpan tungod sa pagpaninda og prutas sa aseras gikan sa nagkalain-laing karsada sa dakbayan.
Dili rason nga kay pirme nang madakpan kining tawhana tungod sa pagpamaligya diha sa aseras, dili na tahuron iyang tawhanong katungod, mao nga bisan kinsang netizen nga nakakita sa viral video wala gyud malipay sa ilang gibuhat.
Ang tawong mogamit sa maong rason kadto rang mga tawong hambugero, abusado ug gustong magpatahod, apan wala silay luna panerbisyo sa publiko.