Gianunsyo ni Mayor Edgardo Labella atol sa gipahigayong presscon ang clamping moratorium o temporaryong pagpahunong sa pag clamp sa mga sakyanan nga mag parking bisan asa.
Kini ipatuman dili lang sa vicinity sa Basilica del Sto. Niño kondili sa tibook Siyudad gyud sa Sugbo.
Matud sa mayor nga magsugod ang clamping moratorium alas 10 sa gabii hangtod na sa alas 7 sa buntag.
Kini human higpit nga gipatuman sa CCTO ang clamping ordinance diin daghan kaayong mga sakyanan ang naklaman sa vicinity sa Basilica bisan pa man og kaadlawon walay gipalabat nila.
In fairness sa CCTO igo ra man pud silang naghimo sa ilang trabaho kay naa man lagiy lagda nga kinahanglang sundon.
Kun by the book, gyud ang ilang ipatigbabaw aw dili maliso ug malalis ang balaod.
Apan kun ipadaplin una nila kini ug ipalutaw ang katawhanon ilabi na sa kapistahan sa Balaang Bata nga si Senyor Sto. Niño segurado mo-consider gyud sila.
Ang tumong ug tuyo lang sa mga deboto nga makasimba atol sa kaadlawon diin ihalad ang misa nobenaryo.
Sa dakong kakugang naproblema naman hinoon sila kay giklaman naman ang ilang sakyanan.
Miani og negatibong reaksyon ang gihimo sa CCTO kay asa naman lang daw ang humanitarian consideration.
Si Mayor Labella naminaw sa pulso sa mga tawo og mimando nga ldili ipatuman ang clamping sa gilatid niya nga oras.
Apan human sa alas 7 sa buntag balik sa naandan ang CCTO kay mao lagi pud ang responsibilidad nila.
Kay kon dili nila kini himoon basin maproblema og samot sa kahuot unya sa traffic ug sa mga tawo ilabi na sa Basilica nga area.
Maayo nalang kay nihatag og window ang mayor nga luagan ang palisiya tungod ug alang usab sa pagsaulog nato sa kapistahan sa Senyor Sto. Niño.