Nag-viral na usab sa social media ang usa ka langyaw kauban ang iyang asawa nga Pinay dihang gipamunit nila ang mga basura nga gipangbilin sa mga deboto kuno human sa gitambongan nga misa didto sa Pilgrim Center sa Basilica del Sto. Niño.
Makita sa video nga kuha ni Dods Milan, usa ka tour guide, ang pagpakabana sa magtiayon nga namunit sa mga plastic bottle ug uban pa nga mga basura nga gibiyaan lang human sa misa.
Pastilan walay ni isa nga nagpakabana sa pagtabang sa paghipos diin ang tanan naglumbaanay sa makauna sa pag gawas.
Sa mga deboto, ang tumong sa pagtambong sa misa mao ang pagyukbo sa Balaang Bata inubanan sa pangamuyo ug pasalamat.
Ang pagyukbo mao ang respeto ug gugma nato kang Sto. Niño apan sa gihimo nga paghugawhugaw sa balay alampoanan, asa naman ang respeto niini?
Angayan masabtan ug pamation sa mga deboto nga dili lang kutob sa linawas nga pagtambong sa misa ang giadto sa simbahan kun dili apil ang tibuok nga pagkatawo ug labaw sa tanan alang sa pagkaon sa atong kalag.
Unsaon man nato sa pagpakita sa atong gugma Kaniya kon gihimo natong basurahan ang Iyang templo?
Pila ra man unta sa pagbitbit sa plastic inig gawas o kaha ibutang sa trash bin nga anaa sa kilid kilid sa Basilica, bug-at naman lang gyud kaayo na?
Kadakong kauwaw dili lang sa mga mata sa langyaw nga nanghipos sa mga hugaw kon dili dakong kauwaw ngadto sa Balaang Niño nga maoy giyukboan nato unya ato lang hugaw hugawan ang Iyang pinoy-anan?
Maayo lang mangayo og pabor unya gamayng butang alang Kaniya dili pa gyud mahimo? Ang paglimpyo nato sa atong kahiladman sama usab sa paglimpyo nato sa mga hugaw nga anaa sa atong palibot. Cleanliness is next to Godliness, ang pagka hugawan mao ang pagka____kamo nalay sumpay.