Napulo ka mga mayor sa kalungsoran dinhi sa nasud, apil ang mayor sa lungsod sa Ginatilan dinhi sa Sugbo, ang gikiha sa Department of Interior and Local Government atubangan sa Ombudsman tungod sa kapakyas niini pagtuman sa kamanduan ni Presidente Rodrigo Duterte nga hawanan ang mga karsada sa ilang dapit.
Si Undersecretary Epimaco Densing III maoy nisang-at sa reklamong grave miscondut ug gross neglect of duty batok sa 10 ka mga mayor apil na ni Mayor Dean Michael Singco sa Ginatilan.
Sa iyang post sa Facebook gipahibawo ni Densing nga duna pay dugang lima ka mga mayor ang ilang ikiha sa umaabot nga mga adlaw ug dunay laing usa ka mayor gikan sa Sugbo ang malakip niini. Sa ato pa duha na unya ka mga mayor gikan sa lalawigan sa Sugbo ang mag-atubang og kaso sa Ombudsman tungod sa matud pa kapakyas pagpanghawan sa ilang mga karsada ug sidewalk. Sa akong interview ni Mayor Singco, iyang giangkon nga naglibog siya unsay gibasihan sa DILG sa paghatag og grado sa iyang lungsod.
Nasubo siya nga bisan sa pagsunod nila sa tanang lagda nga gilatid sa ahensiya, nagpabiling hagbong ang iyang grado.
Kini maoy hinungdan nga niturok ang iyang pagduda nga dunay politika nga nagpaluyo niining maong kampanya.
Nasayod hinuon ta nga ang politika maoy sayon kaayo nga lansis sa mga opisyal sa higayon nga sama niini.
Apan dili sab gyud kalikayan nga mahibulong ang katawhan nganong ang usa ka gamay nga lungsod ug 5th class municipality ra man maoy nahagbong?
Kun kahuot ug kasamok sa karsada ang atong sukaranan, wala ra intawon sa kumingking ang ilang sitwasyon sa Ginatilan kun atong itandi sa mga lungsod ug syudad sa Metro Cebu.
Busa ang pangutana, giunsa man paghimo nila ang evaluation? Unsa ka kasaligan ang mga sakop sa validation team nga mihimo sa pagsuhid sa kadalanan nga maoy gibasihan sa paghatag og grado sa mga mayor? Tinud-anay ba silang naghimo sa ilang trabaho o gitagna-tagna lang ang paghatag sa grado sigun sa kalig-on sa koneksiyon sa politika sa mayor.
Pananglitan dinhi sa dakbayan sa Sugbo, usa sa mga sakop sa validation team nga akong kaila mikumpisal gyud nga siya mismo wala makauyon sa pamaagi sa ilang gihimong validation.
Kini tungod kay gipahibawong daan sa DILG ang LGU nga hingtungdan nga mohimo sila og inspection. Ang resulta ang mga sakop pa sa PROBE Team sa dakbayan maoy naggiya nila.
Samtang nagbaktas ang mga tinugyanan sa DILG nga kunohay naghimo og validation, nag-una pud ang mga sakop sa PROBE Team aron paghawan sa ilang agianan.
Kun seryoso gyud ang DILG niining kampanya paghawan sa kadalanan, himoang surprisa ang inspection.
Ayaw pahibaw-a daan ang mga LGU sa inyong buhaton nga daw sa buot mong magpaandam og kumbira sa inyong pagbisita.