Ang dili makalimtan

Kumusta? Wala bay nabuthan og mga rebentador? Bitaw, dako na kaayo og kausaban karon. Sa miaging Pasko, mora’g upat ra ang nabuthan og rebentador nga nadala sa Cebu City Medical Center.

Kaniadtong mga 1990 hangtud 1994, pwerteng daghana pa sa mga mabuthan og rebentador. Moabot gud og kapin 200 ang mabuthan ug mangaputol ang tudlo nga madala sa Vicente Sotto Memorial Medical Center ug sa CCMC.   

Pero paglabay sa katuigan, menos na ang mga nabiktima. Tingali, mora’g wala na kaayo’y gusto nga magpabuto. Kon duna man gani, magmatngon na gyud ug dili na magkiat.

Tiaw mo nga diha’y hubog kaniadto nga nanigarilyo samtang nagpabuto og rebentador. Pagduslit niya sa rebentador, giitsa niya ang iyang sigarilyo ug ang rebentador maoy giyupyop.

Samtang nag-interview gud ko sa iyang kauban, wala ko makapugong sa pagkatawa. Pwerteng dakoa sa samad sa iyang wait ug nahingo ang ngipon.

Pero, dili sab ko makalimot nga may guwangon na nga lalaki ug kwatsinanggo kaayo.

Bisan og bukog na lang ang nahibilin sa iyang duha ka tudlo nga nabuthan og rebentador, wala gihapon moundang og komedya.

Dili kuno siya magmahay nga putlon sa doktor ang mga bukog sa duha niya ka tudlo, kay matud niya ang maong mga tudlo, natagbaw na kuno sa iyang mga uyab. Pastilan.

* * *

Sugod karong adlawa, bag-o na ang akong trabaho. Moundang usa ko sa pagka-radio reporter, kay karong gabii, magsugod na ang akong programa sa radyo nga mag-ulohan og Birador!

Mabati ninyo kini sa DYLA 909 KHz gikan sa alas 8:30 ngadto sa alas 9:30 sa gabii, Lunes hangtud sa Biyernes. Gituyo nako nga bakante ko sa Sabado ug Domingo kay aron makalugar sab ta pagsuroy.

Ang akong programa sa radyo maghisgot sa mga isyu nga naglambigit ang publiko.

Dili kini binayran og politiko mao nga makapaabot kamo nga tinuoray’ng isyu ang akong hisgotan.

Usa hinuon sa akong mahimong sponsor sa programa mao ang Philippine Charity Sweepstakes Office (PCSO), mao nga makapaabot kamo nga hisgotan gyud nako ang isyu sa illegal swertres.

Wala malilong kaninyo nga mikatap pag-ayo ang mga illegal swertres dinhi sa ato.

Hisgotan usab nato ang problema sa basura, lunop ug ang trapiko.

Isip sakop sa Cebu City Traffic Management Board, mahimong takus ko nga modiskuter sa mga isyu nga maglambigit sa traffic.

Busa, ubani ko ninyo sa akong programa nga gitumong isip public service.