Pasko, bagyo ug eklipse
Mangandam na tang daan di lang sa basa kon dili sa mabagyuhon gyod nga Pasko karong Miyerkles. Kay nipasidaan ang PAGASA nga nianang adlawa kinadul-an sa Sugbo ang bagyong Ursula, nga samtang nagkaduol sa Philippine Area of Responsibility (PAR) naghagiyos sa gikusgong 45 ngadto sa 60 ka kilometro matag takna.
Gitakda si Ursula nga mosud sa PAR karong gabii o ugma sa kadlawon. Karong buntag gitakda siyang mahimutang sa silangang bahin sa Hinatuan, Surigao del Sur, nga mao say giagian sa gisundan niya nga low pressure area (LPA) sa niaging semana.
* * *
Mas mokusog ang hangin ni Ursula sugod ugma sa buntag samtang magkaduol siya sa Mindanao. Magsugod nang uwan sa Sugbo ug ubang bahin sa Kabisay-an unya sa Martes, kanus-a gitakdang mahimutang na siya sa silangang bahin sa Surigao City sa Surigao del Norte. Nangagpas ang PAGASA nga motugpa si Ursula sa yuta sa tungatunga sa silangang Kabisay-an ug Caraga.
Dayon molatas si Ursula sa Kabisay-an. Karong Miyerkules sa buntag, sa adlaw sa Pasko, gibanabana sa PAGASA nga mahimutang si Ursula sa 80 ka kilometro sa amihanan amihanang kasadpan nga bahin sa Sugbo, o 15 ka kilometro sa amihanan silangang bahin sa Escalante City sa Negros Occidental.
* * *
Mahasol sa gipasidaan nga kusog nga uwan nga ibubo ni Ursula ang mga manimbahay sa kataposang adlaw sa misa sa kadlawon dayong Pasko. Gitambagan sila sa PAGASA sa pagda og payong aron di mangabasa ug pagsul-ob og mas baga nga mga sapot pangandam sa mas ubos nga temperatura.
Gikabalak-an nga maigo na sab sa bag-ong bagyo ang mga molupyo sa mga lalawigan sa Samar ug Leyte nga wa pa gani makabangon gikan sa lapad nga kadaot sa pagkusukuso sa bagyong Tisoy tulo ka semana pa lang ang nilabay.
* * *
Paspas hinuon ang pag-irog ni Ursula, 40 ka kilometro matag takna paingon sa kasadpan. Maong sa liwas sa Pasko gitakda siya nga mahimutang na sa kasadpan habagatan kasadpang bahin sa Coron, Palawan.
Gipanghinaot nga motin-aw nang kahimtang sa panahon sa Sugbo, kabisay-an ug Mindanao karong Huwebes, Disyembre 26. Aron mabantang ang annular solar eclipse, nga dinhi sa Sugbo magsugod sa alas-12:40 sa udto hangtod sa alas-3:54 sa hapon.
- Latest
