Bag-ong MCWD Board

Karong sunod buwan, ug kon dili man gani, unya sa Pebrero, motudlo na si Mayor Edgar Labella og bag-ong mga Board of Directors sa MCWD.

Gipasalig ni Mayor Labella nga pilion gyud niya nga itudlo sa maong pwesto ang mga tawo nga dunay panglantaw pagsulbad sa problema sa kanihit sa tubig dinhi sa siyudad ug sa ubang dapit sa Metro Cebu.

May mga ngalan na nga mitumaw kun kinsa ang pipila sa posibleng molangkob sa MCWD Board nga itudlo ni Mayor Labella sa pwesto, apan paaboton lang nato ang mayor nga maoy mopahibalo niini. Nindot sab ang labing ulahi nga kalamboan nga ang tulo ka sakop sa MCWD Board nga mikwestyon sa pag-terminate nila Mayor Labella sa ilang katungdanan, misibog na sa gipasaka nilang kaso sa hukmanan.

Bitaw, bisan ako nadismaya pag-ayo niadtong miaging mga sakop sa MCWD Board nga gipangulohan ni Joel Mari Yu, nga kadaghanan mga pinili ni kanhi mayor Tomas Osmena.

Wala gyud sila makahatag og sulbad sa problema sa kanihit og tubig. Sa among lugar, niabot gyud og tulo ka buwan nga walay agas ang among mga gripo ug panagsa ra tawon mi mahatdan sa tanker sa MCWD.

Pwerte gyud tawon nga kapuya nga magsige og hakot og tubig gikan sa booster pump sa MCWD diha sa atubangan sa Camp Lapu-Lapu.

Kaming taga ibabaw nga bahin sa siyudad, wala mi modemanda nga moagas kanunay ang among mga gripo, bisan tagduha ka oras na lang gud unta sa kaadlawon, maayo na kaayo.

Apan kon tulo ka buwan nga walay agas-agas, dili na sab ni maayo, samtang ang hotel nga nagbuntaog sa bukid sa Lahug wala mahutdi og tubig.

Bi, kon kamo ang anaa sa among lugar, unsay moabot sa inyong hunahuna? Nganong moagas man ang mga gripo sa mga nagpuyo palibot sa hotel, unya sa among lugar wala may bisan gamay.

Mao nga bisan ang Local Water Utilities Administration (LWUA) misuporta ni Mayor Labella sa pag-terminate sa lima ka sakop sa MCWD Board.