EDITORYAL - Abunda og fake news

Nganong halinon kaayo ang fake news dinhi sa Pilipinas? Ang Pilipinas adunay 94 milyones ka mga internet users sumala pa sa uwahing pagtuon.

Kaning maong internet users tiggamitan og cellphones ug kompyuter, apan pare-parehas ra sila nga dunay social media accounts nga kada adlaw gitutokan.

Ang social media nahimong venue sa mga nagnegosyo og impormasyon, apil na niini ang mga naghimo og fake news.

Dili parehas kaniadto ang mga eksperto sa kompyuter maihap lang ug dili kaayo ilado, apan karon daghan na kaayo ang makamao niini ug organisado na ug nakat-on unsaon makakwarta gamit ang internet.

May papel pagkatap sa fake news ang mga politiko, mga PR companies, advertisers.

Kaniadto ang mga dili katuohang mga post giisip ra nga mga “satirical news” o mga dili tinuod nga balita apan makalingaw. Walay intensyong dauton o gubaon ang reputasyon sa usa ka tawo o grupo.

Apan kadugayan, ilabi na niadtong naghinangat ang 2016 elections may tawo o grupo nang gipuntariya ang mga posts.

Nagsugod kini dihang kining mga graphic artists ug computer programmers ug mga bloggers gikuha sa mga politiko, PR companies, advertisers ug social influencers alang sa kampanya.

Ang kampanya gipaagi sa pagpahumot sa ilang manok ug pagdaot sab sa mga kaatbang, ang uban tinuod apan kadaghanan fake news gyud.

Direkta ug dili direktang empleyado sa mga politiko kining mga tawhana, ang ilang serbisyo magagad sa makaya sa bulsa ug konsensya sa nag-hire kanila.

Kay lagi pirme mang nakatutok sa social media ang mga Pilipino, dali ra kaayo ang pagbombardiyo og mga impormasyon ngadto kanila. Subo lang nga daghan niini fake news.

Ug kay nabatasan naman karon sa mga netizens ang dili magkutikuti bahin sa posts kampante ra sab ang nagsige og buhat niini maong nisanay gyud ang fake news dinhi. Hangtud nga way lig-ong mga balaod nga mabuhat batok niini o bisan nalang pag-regulate sa social media platform ug padayong magpadala ang mga netizens aning fake news, dili kini mahunong.