Nanimaho na ang litson sa Pasko. Nagkakusog na ang halin sa mga tindahan sanglit nagsugod nag panon ang mga Ninong ug Ninang pagpamalit daan og mga regalo alang sa mga kinugos, kahigalaan, kaparyentihan og uban pang suod pag-abot sa Holiday Season. Hinumdomi. Pagkahimugso nato, bisan usa wala tay dala. Inig balik sab nato ngadto sa atong Magbubuhat aron hukman, wala pud tay dad-on. Busa, angay puy-an ang kamanggihatagon samtang buhi pa.
May usa ka bilyonariyong mayor nga dihang namatay gisulod og mahalong lungon, diin ang pikas ug pikas nga bahin niini gibutangag lungag nga sarang kalutsan sa duruha niya ka kamot, segun sa iyang gipanugon sa wala pa mamatay.
Gikan sa ilaha padulong sa simbahan, ug gikan sa simbahan paingon sa lubnganan, gipas-an ang iyang lungon nga gipagawas ang walag tuo niyang kamot nga pulos binukhad aron ipakita sa nahabiling mga adunahang politiko ug magpapatigayon, nga mobiya ang bilyonariyong mayor ning kalibotan nga walay dala.
Pagkatahom sa mensahe nga iyang gibilin. Iyang gipasidan-an ang tanang tawo, labi na niadtong nangilad, namintaha ug nangawat og kuwarta sa katawhan, nga kining pagtumpitumpig daghang salapi ug bahandi, kawang lamang. Kay inig kamatay nato, ibilin ra gyod ning tanan dinhi sa yuta nga maoy motabon sa lawas kansang kabaho dili matakpan hangtod sa pagkadugta tungod sa mga daotang binuhatan nga dili malangkat sa mga kasingkasing linupigan.
Adunay usa ka batan-ong adunahan, miduol ni Hesus, miingon: ”Ginoo, gusto kong maha-Langit, unsay buhaton ko?” Mitubag-sukna si Hesus: “Gituman mo ba ang mga sugo sa Diyos?” Mitando ang batan-on:
“Oo, sukad niadtong bata pa ako, gituman ko na kini.” “Duna pay nakakulang.” Sumpay ni Hesus. “Unsa man, Ginoo?” Madasigong pakisayod sa batan-on.
Ug giingnan siya ni Hesus: “Ibaligya ang tanan mong kabtangan, iapod-apod sa mga kabos ang halin, unya balik ug sunod nako.” Apan mitalikod-biya ang batan-ong adunahan. Di niya kaya sundon ang pinaling sugo ni Hesus nga segurado niyang makapa-Langit. Mas mahal niya ang makabuhong sa lawasnong kahakog kay sa pagkaon nga makabusog sa kalag. Bakakon siya. Dili langit iyang gusto. Impiyerno diay!
Pipila kaha ka dato ning atong nasod ang susamag kinaiya sa batan-on?