Gamita ang utok
RENBOR PATROL - Rene U. Borromeo (Banat) - November 19, 2019 - 12:00am

Kamo ba nga mga kontraktor og mga building project, pagbaton sab mo og pamatasan uy. Usa sa akong gipasabot niini mao ang kontraktor sa condominium project diha sa unahan sa Marco Polo Plaza Hotel, sa nahimutangan kaniadto sa karaang Casino Filipino.

Nagsugod na sila pagbuhos og mga semento ngadto sa foundation sa building. Ambot, pila ka libo ka sakong semento nga gisulod sa dagko kaayong cement mixer ang gibuhos diha.

Ang problema mao ni. Gikan nga naghatud og semento ang mga dagkong truck nga gikargahan og cement mixer, inig-gawas nila aron mokuha na usab og semento, magpangatagak ang semento sa karsada.

Ang uban namilit sa ligid ug mamilit sa karsada. Gawas nga daghan na nga dakal-dakal ang karsada, pag-uga sa semento, makamugna kini og grabeng abog.

Personal gyud ko nga nakasaksi niini kay anaa man ko mag-agian dihang dapita. Ang pino kaayong abog sa semento, namilit sa lainlaing parte sa mga tindahan ug panimalay.

Ang mga nagpuyo sa balay sa pamilya ni kanhi Supreme Court Chief Justice Marcelo Fernan ug uban pa, apil nga nasakripisyo.

Angay’ng tagdon dayon kini ni Mayor Edgardo Labella pinaagi sa pagsugo og iyang sakop aron mahunong na kining tinonto sa kontraktor nga walay pagpakabana sa kahimtang ug panglawas sa katawhan.

Ang angay nilang himoon magbutang sila og pressure washer aron ang mga ligid sa sakyanan ug ang kabahin sa cement mixer, ilang pasiritan kon mogawas na gikan sa construction site.

* * *

Kun mahitabo nga madam-agan mo og motor, ug ubang sakyanan nga ang plaka 070109, o kaha 070102, mailhan kaha pagdali ang nakadam-ag kaninyo? Ang tubag niini — dili.

Ngano man? Dili kay usa lang ka sakyanan ang migamit niining mao nga matang sa plaka. Diha’y usa ka buntag nga gikan ko nga naghatud sa akong bata sa eskwelahan, upat gyud ka motorsiklo ug usa ka multicab ang akong nasundan nga ang plaka 070109.

Ambot kun ngano nga ang kadagkoan sa LTO mitugot man niini nga dili man kini maoy gimando sa ilang central office.

Ang gimando nga ipagamit isip temporary plate mao man ang mga Motor Vehicle File Number, sama sa 0701-675231, ug dili ang unom ka digit.

Ang gipasabot gud nianang 070109 mao nga ang “07” Code kana nga mailhan nga ang sakyanan girehistro dinhi sa Central Visayas, unya ang “01” mao nga kini girehistro diha sa LTO district sa Natalio Bacalso Avenue, ug ang “09” nga ang pagrehistro, gihimo sa buwan sa Septiyembre.

Kadaghang sakyanan nga marehistro sa usa ka buwan nga pareho ang plate number?

Nasabtan ba ninyo? Unya, nganong gitugot man kini nila, ug wala man tumana ang kamandoan sa LTO-Manila?

LTO
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with