Insulto kanatong mga Pilipino

Dakong insulto gyud kanatong katawhang Pilipinhon ang pagtumaw sa balita nga ang Pilipinas mao na ang nag-unang importer sa bugas sa kalibotan karon. Dili kini maayo tungod kay nagpasabot kini nga nahagba na gayud ang industriya sa bugas.

Sa report gikan sa United States Department of Agriculture-Foreign Agricultural Service (USDA-FAS), ang Pilipinas miangkat gikan sa ubang kanasuran og tres milyones nga metriko tonelada (MT) nga bugas karong tuiga.

Ang maong gidaghanon maoy nagbutang sa Pilipinas sa numero uno sa listahan sa mga nasud nga nag-import og bugas. Gani, basi sa taho sa USDA-FAS, naapsan pa sa Pilipinas ang China sa gidaghanon pag-angkat og bugas humay.

Ang China, kansang populasyon dili momenos sa P1.3 bilyones ug subra sa napulo ka pilo ang gidaghanon ikumpara sa populasyon sa Pilipinas, mi-import og 2.5 MT nga bugas karong tuiga, ubos og 500,000 MT sa giangkat sa atong nasud.

Dili maayo kini nga balita ug dako kini nga sagpa kanatong katawhang Pilipinhon. Kini gumikan kay hingpit nga nawala na ang atong kabilin sa atong dakong kontribusyon sa kalamboan sa humay sa kalibotan.

Kaniadtong dekada 60, nagpanon pag-anhi sa nasud ang mga scholar gikan sa laing kanasuran aron pagtuon sa paglambo sa humay diha sa nabantog nga International Rice Research Institute sa University of the Philippines-Los Baños sa Laguna.

Ang ilang nakat-onan diha sa IRRI nahimong dakong asset sa ilang nasud diin ila gyung gipalambo ang tanom nga humay. Karon ang Thailand, Vietnam, Cambodia maoy tulo lamang sa mga nag-unang exporter sa bugas humay sa tibuok kalibotan.

Subong palandungon nga dinhi sa Pilipinas, diin unang napalambo ang humay pinaagi sa teknolohiya sa IRRI, mitiurok gayud ang industriya sa bugas. Kini gumikan usab sa dakong kakulang sa atensiyon gikan sa kagamhanan.