Negosyo sa paglisudlisod
Nihapit mi sa akong asawa sayo ning semanaha sa sanga sa courier company duol sa Consolacion sa amihanang Sugbo aron magpatabang sa pagpada sa iyang dibuho sa water color ngadto sa iyang higala sa Cainta, Rizal.
Pagkakita sa mga kawani nga nagbitbit mi og painting nga may bayanan, giingnan mi nila nga kinahanglang mopalit og bubble wrap (putos nga plastik nga may burutburot).
Nitanyag mi nga mopalit gikan nila apan nibalibad nga wa silay baligya ug niawhag namo sa pag-adto sa customer service booth sa shopping mall nga ilang nahimutangan.
* * *
Kay padung na man ming namauli, nisugyot ang akong asawa nga susihon lang una sa among bay magamit bang bubble wrap sa painting sa laing higala nga bag-o lang niyang nadawat. Apan wa na namo nakit-ing putos.
Pagkasunod adlaw gibitbit nakong iyang painting paingon sa bookstore sa laing shopping mall sa Consolacion.
Kay wa man kong kaila og bubble wrap, ang mga kawani maoy akong gipalihug pagpangita sa labing tukmang sukod. Nipalit kog duha aron isapaw og putos paghimong mas luwas sa painting sa panaw paingon sa Cainta.
* * *
Nibalik ko sa courier ug gipakita sa mga kawani nga nakapalit na ko’g bubble wrap. Gipasuwatan nila ang porma sa hingpit nga ngan, address ug numero sa telepono sa among padad-an.
Pag-abot sa akong turno kay duna may linya giingnan ko nila nga di nila madawat ang akong painting kay gawas sa bubble wrap kinahanglan pa og dugang pahuot aron nga di maglamba-lamba sud sa ilang kahon.
Ug wa silay ikahatag nakong pahuot kinahanglang mangita kog ako.
* * *
May nakasugyot nako og laing courier nga mohimo og crate sa mga kargamentong may bildo sama sa painting. Dihang akong gitawgan, gipaadto ko sa ilang sanga sa Mandaue kay mao ray makahimo og crate.
Pag-abot nako didto, giingnan ko sa mga kawani nga kinahanglang akoy moputos sa bubble wrap kay igo na lang silang mo-crate.
Sa niaging adlaw, malipayong gitawgan ang akong asawa sa iyang higala sa Cainta nga nadawat nang painting.
Bisan sa tam-is nga pasalamat sa akong asawa, nanaguto kong naghinuktok nganong ang duha ka courier nga among gidangpan nipili man sa paglisudlisod sa ilang mga kustomer.
* * *
- Latest
