Action na mayor!

Angay gyud nga mandoan ni Mayor Edgar Labella ang director sa Cebu City Police Office (CCPO) nga magmugna kini og grupo nga tahasan sa paghimo og kampanya batok sa mga illegal gambling.

Akong balikon nga anaa sa balaod (Republic Act 8551) nga ang mga mayor maoy gihatagan og gahum nga mosuperbisar sa kampanya batok sa ilegal nga mga sugal.

Wala malilong kanato nga midagsang ang mga illegal swertres, video karera machines, ug moli-moli, organized nga tigbakay ug uban pa, sa lainlaing mga barangay sa siyudad.

Kaniadto ang kapolisan dunay Vice Control Section nga gitahasan paghimo’g kampanya batok niining maong mga kalapasan sa balaod.

Subsob ang operation nga ilang gihimo, apan karon gipasagdan ra man nila ang mga illegal gambling.

Kini ra ba’ng mga nag-operate og illegal swertres, magbutang kini sila og gagmay’ng outlets (booth) nga anaa sa daplin sa mga karsada ug ubang mga lugar aron ipatuo nga legal ang ilang kalihokan.

Unya, angay’ng susihon ni Koronel Geovanie Maines ang giingong kalambigitan sa usa ka opisyal sa Cebu City Police Advisory Council (PAC) sa operasyon sa illegal swertres dinhi sa siyudad.

Ang ako lang nahibudngan kay makadaghan na gyud ko nga nagtinguha nga mo-interview niining maong opisyal, apan dili motubag kun tawgon. Mora’g makaduda na lang hinoon ta.

Siya ra ba gyud ang giingon nga maoy nagpahatag unta og “payola” ngadto sa usa ka opisyal sa kapolisan. Tingali bugti niini nga dili himoan og operation ang mga illegal swertres dinhi sa siyudad.

Mao na nga makaingon ko nga kining mga polis nga nagpakahilom lang sa illegal nga mga sugal, nagdawat kini sila og payola gikan sa mga tigpasiugda sa illegal swertres.

Gihatagan man gani ang usa ka junior official sa kapolisan, ang mga dagko pa kaha?

Busa, angay’ng molihok na niini sila si Brigadier General Valeriano del Leon, ang regional director sa PRO-7, ug si Mayor Labella ug ang ubang mga mayor, aron dili magduda ang katawhan ninyo.

Tiaw mo, hangtud karon wala gyud makahimo og operation ang kapolisan?

Angay’ng molihok na niini si Koronel Royina Garma, ang general manager sa Philippine Charity Sweepstakes (PCSO) ug iyang irekomendar kang Presidente Duterte nga silotan ang mga polis nga dili moaksyon.

Paminaw nako, kun dili tinuod sa kadagkoan sa kapolisan ug sa mayor, magpakabuta-bungol lang ang mga polis ug ihilam-os lang ang kauwaw sa mga pagsaway kanila, kay pirmi man ang ila. Dili va gud?