Listahan diay sa paukyab
Aron pagtabon sa makauuwaw nga pagkanselar sa pipila sa 75 ka flagship projects sa Build, Build, Build program ni Presidente Rodrigo Duterte—apil nang higanteng mga taytayan nga magsumpay unta sa Sugbo, Bohol, Negros ug Leyte—gipatas-an ang listahan nga karon naglakip na og 100 ka proyekto.
Kun siyam ra sa orihinal nga 75 ang nasugdan hangtod sa Hulyo ning tuiga—nga di tingali pakauwaw sa pamunoan kay gikan man sa National Economic and Development Authority (NEDA) ang kasayuran—unsa may garantiya nga mapatuman sa gitakda nga panahon ang mas daghan pang mga proyekto?
* * *
Makahasol ang kasayon sa pagkanselar ug pagpuno sa listahan sa flagship projects:
• Unsa may kapuslanan sa unang listahan nga gipatabanan og pasalig nga mosangpot sa “golden age of infrastructure,” di diay giya sa mosunod nga katuigan kon di paukyab lang?;
• Unsa may sukaranan sa pagpanglista sa mga proyekto, wa diay pakapini og pakisusi unsa kalawom ang dagat nga ugbokan og mga taytayan, pilay kuwarta nga gikinahanglan ug may teknolohiya na bang magamit?; ug
• Unsa man kakasilagan ang bag-ong listahan nga may pasidaan na man nga mahimong usab-usabon matag buwan?
* * *
Mas makahasol ang nisiwil nang pasiuna nga mga detalye sa bag-ong listahan sa 100 ka proyekto:
• Naapil ang pipila ka proyekto nga nasugdan na sa mga pamunoan nilang kanhi Presidente Gloria Macapagal Arroyo ug kanhi Presidente Noynoy Aquino;
• Dul-an sa katunga sa mga proyekto di mahuman sa pagkapupos sa termino ni Presidente Duterte; ug
• Kasagaran sa bag-ong mga proyekto unya na masugdan sa pagtukod sa 2022, ang kataposang tuig ni Duterte sa Malakanyang.
* * *
Labing lig-on nga sukaranan sa kabalaka nga wa gihapoy mahitabo bisan kapila pa usab-usabon ang listahan sa flagship projects mao ang nabisto nga kakuwang og katakos sa mga buhatan sa gobyerno sa pagpatuman sa higanteng mga proyekto:
• Ang Department of Transportation (DOTr), nga gitahasan sa pagpatuman sa 88% sa mga proyekto, nasakpan sa Commission on Audit (COA) nga nakagasto lang og 25% sa ilang budget niadtong 2017 ug 24% sa 2018; ug
• Arang-arang og diyutay ang Department of Public Works and Highways (DPWH) kay napamatud-an nga nakagasto lang og 34% sa ilang budget niadtong 2017 ug 40% sa 2018.
* * *
- Latest
