Tataw na kinsa ang ‘kusinero’

Gitataw ni Mayor Edgar Labella nga ang Sinulog Governing Board (SGB) ug ang Sinulog Foundation, Inc. (SFI) adunay managtambayayong nga gimbuhaton sa pagpangandam alang sa Sinulog 2020.  Sukwahi kini sa gipamulong ni SGB Executive Director Barney Borja nga mahimong mopahigayon ang SGB og mga kalihokan sa Sinulog 2020 nga dili na kinahanglan ang pagtugot sa SFI. Niining pamahayag sa Mayor, hinaut nga natataw na kon kinsa ang “kusinero” nga gitahasan pagtimpla sa “sabaw” nga ginganlan ug Sinulog 2020. Makalaum na tingale ang katawhan og “lamian nga putahe” sa umaabot nga Sinulog. Hinaut pa unta!

Politika sa pista

Sa unang adlaw pa lang sa pagbukas sa kasaulogan sa kapistahan sa Birhen sa Regla, ang Patron sa Lapu-Lapu City, giingon nga naduhig kini dayon sa buling sa pamolitika, diin ang matag politikanhong habig miakusar sa usag-usa nga nang-sabotahe sa fluvial procession bisan pa man nga walay habig nga miangkon sa isig ka akusasyon. Matud pa ni US President Franklin Roosevelt nga “Sa politika, walay mahitabo gumikan sa aksidente.  Kon aduna man ugaling mahitabo, makalaom ka nga gilaraw kana sa maong paagi”. Maayo tingale nga iapil sa pagpangamuyo sa katawhan sa Lapu-Lapu City nga mahunong na ang pamolitika sa ilang dakbayan. Kon dili mahunong, basin maalaut ang katawhan, hasta Patron, mapagan! Faeetz!

Kumbati pa bisan gors na

Segun sa balita, adunay kinse (15) ka senior citizens sa Metro Manila ang makabenepisyo sa “employment program” nga gilusad sa kagamhanan ubos sa pagtambayayong sa Ang Probinsyano Party List ug sa Department of Labor and Employment. Matud pa ni Pope Paul VI, “Sa panahon sa atong kabatan-on, hataas ang mga tuig ug hamubo ra ang adlaw; apan sa atong katigulangon, hamubo na ang tuig ug hataas ang adlaw”. Kon dili mapahimuslan, mahimong la-ay ug way bulok ang pagpakabuhi sa mga edaran. Maanindot ang maong programa sa kagamhanan! Kumbati mga Senior!

Peligro nga alternatibo

Adunay kapin 14 mil ka aksidente sa motorsiklo nga misangpot sa kamatayon ang natala sa Metro Manila Development Authority (MMDA) gikan sa buwan sa Enero hangtud Agosto karong tuiga.  Bisan pa man sa ka peligro niini, padayon ang katawhan sa paggamit sa motorsiklo isip sakyanang pampubliko tungod kay kini barato ug sayon mosuot sa trapiko.

Kalisod sa panginabuhi ug panginahanglan ang hinungdan ngano nga mikuyanap ang maong matang sa pampublikong sakyanan. Matud pa sa akong amigo nga habal-habal driver, “Tanan mamatay man; mas maayo na lang ni mag-drive og habal-habal kay sa mamatay nga magsiga ang mata sa kagutom”. Prangka ang akong amigo!