EDITORYAL - Makalibog unsay gusto

Usahay makalibog ang tawo kun unsa gyuy ilang gustong mahitabo sa kampanya batok sa illegal nga drugas sa gobiyerno, tinarong ba nga pinasubay sa balaod o kadtong laktod nga pamaagi.

Ning bag-ohay lang napuno si Pres. Duterte sa pagsige og panaway ni Bise Presidente Leni Robredo sa iyang kampanya.

Si Duterte misaad nga papason niya ang maong problema sud lang sa unom ka buwan kun mahimo siyang presidente, apan tulo ka tuig na ang nilabay wala gyud kini molampos.

Tungod niini gihagit ni Duterte si Robredo nga himuong drug czarina ug gidawat sab kini dayon ni Robredo nga karon co-chairman na sa Inter-Agency Committee on Anti-Illegal Drugs (ICAD). Sumala pa nga wala magdahom ang Palasyo nga dawaton kini ni Robredo.

Ang mga supporters ni Robredo mipasidaan nga basin ‘laang’ kini aron siya maoy basulon kun dili molampos ang kampanya ini og kapupos sa termino sa pangulo.

Apan sa gipakusgang anti-drug operations, gawas sa mga napatay naghuot na karon ang mga prisohan kay daghan sab mga drug users giapil og pasok didto.

Karon daw naipit ang Palasyo sa desisyon ni Robredo kinsa duna nay mga plano gusto niyang ipatuman sa ICAD sama sa rehabilitasyon sa mga drug addicts ug pagbilanggo gyud sa mga drug pushers, pagbuwag sa mga users ug pushers sa prisohan, ug uban pa apil na niini nga mamenusan ang kaso sa pagkamatay sa mga drug suspects.

Apan bisan pa niini, daghan gihapon ang walay salig kang Robredo ug miabot pa sa puntong dunay mga fake news nga gi-post sa social media nga nagmando ang bise presidente nga dili na padad-on og armas ang mga polis sa ilang anti-drug operations. Bisan klaro kaayong imposibleng tuohan, daghan gihapon ang mituo.

Angay pasabton ang katawhan nga dili unta sagulan og bias o politika ang kampanya. Kay ang paglampos dili lang paghurot og pagpapriso sa mga drug pushers ug drug lords kondili apil sab ang pagsalbar sa mga kabataang nagumon sa illegal nga drugas.