EDITORYAL - Robredo isip drug czar
(Banat) - November 8, 2019 - 12:00am

Samtang tuod dunay mga pagdudang dili seryuso o laang kining pagtudlo ni Pres. Rodrigo Duterte kang Bise Presidente Leni Robredo isip drug czar sa Pilipinas, walay dautan kun dawaton sa naulahi ang maong hagit.

Natural lang gyud ang mga dumadapig sa duha pareho gyung magduda kay kanus-a pa ba nagkauyon ang duha sa war on drugs sa gobiyerno?  Mura ni silang duha og lana ug tubig nga di mahimong sagulon sa usa ka panaksan.

Si Duterte migamit sa kinakusgang gahom sa law enforcement units paggukod ug pag-neutralize sa drug traffickers sa nasud nga iyang gihulagway nga maoy moguba sa kaugmaon sa Pilipinas.

Pinaagi sa iyang estilo, daghang mga gidudahang drug suspects ang nangamatay ug tone-toneladang illegal nga drugas ang nasakmit.

Apan si Robredo kinsa sama ni Duterte nga usa ka abogado, nahimo siyang abogado sa Public Attorney’s Office ug miorganisar og nagkalain-laing mga organisasyon ug kahugpongan alang sa proteksyon sa mga kabayen-an sa wala pa kini nisulod sa politika.

Sa background palang ni Robredo isip manlalaban sa mga kabus, dili makapahibulong nganong gilain og sabot sa publiko ang iyang baruganan. Si Duterte isip prosekyutor kaniadto paglutos sa mga kriminal ang iyang porte, samtang si Robredo pagdepensa sa mga kabus nga gisuspetsahang nakahimo og krimen.  Sayod gyud ang katawhan nga dili tanang gipasanginlan sad-an ilabi na kadtong mga nilupigan. Sa samang higayon dili sab tanang suspek wala gyud nakahimo og sala.

Sa pagtudlo kang Robredo sa maong tahas, siguradong iyang korihian ang mga pamaaging gigamit sa Inter-Agency Committee on Anti-Illegal Drugs (ICAD) nga sa iyang tan-aw pagpanglaktod sa balaod.

Kun seryuso gyud si Duterte pagtudlo kaniya, mas manginto ug mas mangugi pa sa paglihok ang mga sakop sa ICAD gamit ang ilang propesyonal nga kaalam nga di na kinahanglang ipaagi sa sumbohan sa armas ang kampanya batok sa illegal nga drugas.

Apan maayong paabuton lang una kun unsay dangatan aning pagkasakop ni Robredo sa ICAD, apan una sa tanan, kinahanglang ilhon una siya isip drug czar sa pundok.

DRUG CZAR
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with