Mao kini ang pulong nga kanunayng litukon ug nahimong prinsipyo nga gibarugan ni Monsignor Esteban Binghay.
Mitaliwan si Msgr. Binghay niadtong Lunes sa edad nga 84 anyos tungod sa pneumonia sulod sa tambalanan diin siya na confine sukad niadtong Oktobre 31. Matud sa mga tawo nga suod kaayo sa monsenyor yano ra gyud kuno kaayo kini bisan og naghambin na kini sa iyang balatian apan dili gyud kuno makita sa iyang panagway ang pag antos.
Mipatigbabaw gihapon ang iyang kasiaw nga maoy trademark ni Monsignor Binghaw nga dili gyud ka dukaon kun siya ang imong kaestorya.
Ang personal secretary niya nga si Roger Largo misaysay nga atol sa kataposang gutlo sa kinabuhi sa pari gikantahan niya kini ug bisan dili na makatingog ang kamot ni Monsenyor Binghay naningkamot kuno nga mo-beat sama sa iyang gihimo panahon nga mokanta kini. Si Monsenyor Binghay ang usa sa mga lider sa simbahan nga genuine, what you see is what you get, ang iyang ka siaw atol sa homily mao usab ang iyang kinaiya kun moabi-abi siya sa mga tawo.
Dali ra usab kaayong maduol, gani usa siya sa mga suod kaayo sa mga sakop sa media kay bisan tawgon kini sa cellphone kay pangayoan sa iyang panahom motubag gyud nga walay paglipod lipod.
Tungod kay wala kaniya ang kinaiya sa pagpakarong-ingnon ug wala usay gitagoan maong matubag niya deretso ang mga pangutana.
Sa prinsipyo niya nga be a Christian first before being a catholic daghan kaayong naigo niini dili lang kadtong mga yanong magtotoo kon dili apil na ang mga pari. Pwera sa maayo daghan ang mga hipokrito sa grupo nga magpatoo nga katoliko apan ang batasan wala mahasubay sa pagtolon-an nga kristyano.
Kadtong nagtoo nga sila nalang ang limpyo ug mga anak sa Ginoo ang kusog kaayo manghukom sa isig ka tawo, kusog manglibak ug kusog makaminus, matawag ba silang Kristyano?
Kadtong mga pari nga makita lang panahon sa misa apan inig human motalikod na ug dayon sulod sa kombento dili gani makigsandurot sa mga parokyano, pagkalisod pa gyud kab-oton ilabi na kadtong mga mayokmok nga magtotoo, apan kon mga adunahan nga sponsor sa simbahan pastilan mao pay mosugat inig abot ug mohatod inig gawas, nahasubay ba kini sa atong pagtulon-an?
Sakit sa mga maigo apan maoy kamatooran, busa hinaut nga duna pay daghan nga mosunod sa hiyas ug mithi ni Msgr. Binghay. Pahuway sa dayon Mons ug didto na sad ka magpakatawa sa langit.