Sa akong damgo
Sa akong damgo dunay lalaki nga nakigsulti nako. Saba kaayo siya ug daghan ang ang iyang gipangyawit. Isog ang iyang bayhon apan imbes mahadlok akong gibati ang dakong panginahanglan nga mangisog aron kapanalipdan ko usab ang akong kahimtang. Nahigmata ko.
Hayag naman diay ug gikinahanglan nga mobangon ko alang sa daghang mga buluhaton nianang adlawa.
Ang maong talan-awon nakapahinumdom kanako niadtong SPFY pa ko.
Ang Spiritual Pastoral Formation Year maoy usa ka tuig nga gigahin alang sa Human ug Psychological Formation sa mga seminarista.
Adunay panultihon nga nga ang tinuod nga away anaa man sa sulod mismo sa atong kaugalingon. Ang anaa sa gawas mga hinungaw lamang sa kun unsay nahitabo kanato sa sulod.
Sa akong gihimong personal analysis ang maong lalaki nga kanako nakigtabi mahimong akong alter ego.
Nga mahimong nagpahinumdom kanako tingali sa akong paglapas kun unsay gipaabot.
O dili ba kaha sila ang mga hinungdan kun nganong daw gibati ko ang tumang kalaay nga tungod niini buot kong mag-inusara ug dili buot nga hasolon pa sa mga significant others nga kanunay’ng nahimong sagabal sa akong autonomy.
Hasol kaayo ning daghan ang manghilabot labina kun maghisgot kita og mga desisyon sa kinabuhi.
Bisan sa gibating kaluya akong gihimo ang pagtuman sa akong mga gimbuhaton ug ang maong adlaw nahimong sama lamang sa laing mga adlaw sa kinabuhi apan dunay usa ka butang nga nindot kaayo sination ug kini ang pagbaton og kahigayonan nga mag-inusara aron sa Dios makigkukabildo. Dili kini mahimong bayran og sapi ug ang malinawong hunahuna.