Sinas posibleng mahimong PNP chief?

Usa si Police Regional Office -7 director Brigadier General Debold Sinas sa mga naapektohan sa major revamp sa mga opisyal tibuok nasud sa Philippine National Police. Gani nanamilit na siya tungod kay tua siya ipadpad sa kaulohan.

Si Sinas gi-transfer ngadto sa National Capital Region Police Office isip bag-ong pangulo sa kapolisan niini. Iyang gipulihan si Major General Guillermo Lorenzo Eleazar, kinsa mao usab ang bag-ong hepe sa PNP Directorial Staff.

Ang pagbalhin ni Sinas ngadto sa kaulohan matawag kini nga dakong promosyon sa iyang tour of duty. Kay dili usab nato matagna nga basin malok-lok siya ngadto sa labing taas nga posisyon sa kapolisan sa umaabot nga mga adlaw.

Kay dili ba nga pipila ka nangulo sa PRO-7 kaniadto misaka man ug mikupot usab og mga dagkong posisyon sa NCRPO. Gani, ang uban nahimo gayud nga PNP chief sama nilang Senador Panfilo Lacson ug Avelino Razon.

Apan dili layo ang posibilidad nga mao usab kini ang padulngan ni Sinas, ilabina kun adunay pay pipila ka tuig nga nahabilin sa iyang serbisyo.

Kini kun atong ibase usab sa iyang performance sa iyang pagka-police official.

Hinuon ang presidente lamang ang makabuot niana. Kun duol ka sa luwag, hayan nga Ikaw ang itudlo ngadto sa maong posisyon. Alang kang Sinas, ang dakong pangutana karon kun nakakapyot ba siya sa abaga ni Duterte. Hinuon, kun performance ang hisgotan, dili malalis nga maayo ang agi ni Sinas. Dinhi lamang sa Sugbo ug tibuok rehiyon sa Central Visayas, dili tiaw ang iyang pagdumala kun basihan ang kampanya alang kahusay ug kalinaw ug ang kumbati batok sa druga.

Kun motugpa si Sinas sa lingkoranan sa PNP chief ilalum niining administrasyong Duterte, iya gayud kana nga destiny.

Ug nagpasabot kana nga adunay dakong pagsalig ang presidente kaniya gumikan sa iyang pagsunod sa mga mando sa pangulo.