Sabotahi sa tubig

Bisan og gipasabot na kanato sa Metropolitan Cebu Water District (MCWD) ang hinungdan nganong nagnihit ang tubig nga ilang giapod-apod sa ilang mga konsumidor apan wala ako makontento niini tungod kay aduna akoy nasayran nga kasayoran nga wala maapil sa ilang gihatag nga rason.

Atong balikan ang mga rason nga gipagawas sa MCWD nganong sa tunga-tungang bahin sa Septiyembre sobra na sa 20,000 ka cubic meter nga tubig ang nawagtang matag adlaw nga nakaapekto usab sa 20,000 ka mga panimalay.

Una, misagol na ang tubig parat sa tubig nga tab-ang nga nakapugos sa ilang mga pribadong supplier og tubig sa pagsira sa ilang mga tinubdan sa tubig sa lungsod sa Consolacion. Ang tubig nga adunay sagol nga parat o dagat dili luwas nga imnon.

Ikaduha, nagkagamay na ang tubig tab-ang ilawom sa yuta nga kinahanglan nga panalipdan aron mapreserbar para sa umaabot nga henerasyon.

Ang MCWD nagkanayon nga 400,000 cubic meter nga tubig ang ilang gikuha ilawom sa yuta ug 60 porsiyento niini ang gi-supply sa mga pribadong supplier og tubig. Moabot sa 40 porsiyento lamang niini ang iya sa MCWD.

Gawas sa duha ka rason nga gihatag kanato sa MCWD sa pagnihit sa tubig, aduna pay laing rason nga wala gitug-an sa MCWD apan  nadiskobrihan sa Metro Cebu Development and Coordinating Board (MCDCB) nga gipangulohan ni Cebu Governor Gwendolyn Garcia ug kini mao ang 60,000 litros nga tubig nga nausik matag adlaw tungod sa buslot ug guba nga tubo sa tubig nga gipasagdan lang ug dugay nga giatiman.

Apan mas maayong tutokan sa MCWD ang posibilidad nga gisabotahi kini sa ilang mga pribadong supplier tungod sa akong nasayran. Sa Kapitolyo, ang mga balay nga direkta nga nagpakonektar sa ilang tubig sa pribadong supplier og tubig sa MCWD wala magkaproblema sa ilang tubig apan ang mga balay nga gisuplayan og tubig sa MCWD nagkaproblema sa tubig.

Unsa may buot ipasabot niini? Dili ba kini sabotahi?