Walay luna ang hazing

Mibisita ang mga sakop sa media sa Regional Training Center 7 sa lungsod sa Consolacion kagahapon nunot usab pagdapit ni Police Brigadier General Debold Sinas, Regional Director sa PRO7.

Atol kini sa kalihokan sa kampo nga gitambongan usab sa pangulo sa kapolisan sa Central Visayas.

Mipakita sa ilang katakos ang kapolisan lakip na ang mga bag-ong police recruits nga kasamtangang nagbansay sulod sa kampo.

Sa natad sa kalingawan diin kahibawo sila manayaw ug mo-drama sama sa pelikula nga ilang gi-dramatize ang mga nag unang isyu nga ila usab kasagaran nga ma-handle sa matag adlaw.

Dinhi makita kon unsa ka versatile ang mga tigpatuman sa balaod, pwedi nila ipakita ang ilang soft side nga epektibo usab kaayo nga dili na mataha ang mga sibilyan kay makab-ot ra man diay o reachable kaayo sila.

Ang pag “humanize sa kapolisan maayo kaayo nga konsepto sa pagpaduol sa katawhan, murag sa PRO 7 ra seguro ni makita nga naay mga pulis mosayaw og tinikling, mokanta ug uban pa.

Bitaw taliwala pa man sa paningkamot karon sa PNP sa pagpahumok sa imahen duna gihapoy nagduda nga basin sa sulod sa ilang organisasyon dunay nahitabo nga pagpanagmal sama sa PMA diin bag ohay lang namatay ang usa ka kadete.

Aron mahatagan katin-awan gihatagan og kahigayonan ni General Sinas ang mga sakop sa media nga ma-penetrate ang training center sa Consolacion.

In fairness makita man sad sa panagway sa mga police trainee ang ka gaan sa ilang kahimtang.

Matud ni sa Regional Training Director PCol. Mario Cacho Cortes nga walay nahitabong hazing sulod sa kampo tungod kay mas gipatigbabaw nila ang disiplina nga walay pagpanagmal kon dili pinaagi sa demirit sa ilang performance.

Sumala usab ni General Sinas nga walay luna kanila ang hazing tungod kay siya mismo nagtoo nga walay matampo nga kaayohan ang pagdagmal sa mga trainees.

Posible gani nga makamugna kini og negatibong epekto kon ang pulis produkto sa hazing kay basin gamiton usab niya sa higayon nga anaa na siya sa serbisyo.

Gipaneguro niya nga mabantayan ang kalihokan sa mga training camp sa kapolisan.