Bungol ug gwatsinanggo

Giawhag ni Presidente Duterte ang mga langyaw nga magpapatigayon sa pagtuman sa balaod labi na ang paghatag sa hustong suholan ug ang pagbayad sa saktong buhis, uban ang pasalig nga kon motuman lang sila, makab-ot gayod nila ang gimithi nga ginansya.  Hinaut unta nga dili mga “Maya’ng Bungol” ang mga langyaw nga magpapatigayon; labaw’ng panghinaut nga dili mga “Gwatsinanggo’ng Unggoy” ang mga kawani sa gobyerno nga gitahasan pagpatuman sa balaod. Lisod na kon magka-abot ang “Bungol” ug ang “Gwatsinanggo”. Pilde gayod ang katawhan ug ang gobyerno! Faeetz!

Lihay sa basol

Taliwala sa mga reklamo sa mga konsumidor bahin sa nagkagrabe nga kakulang sa tubig, nangulipas gihapon ang kadagkoan sa MCWD sa maong kaakohan kay nila pa, diha na ang maong problema sa nilabay nga 30 ka tuig ug dili makiangayon nga sila karon ang basolon. Ang mga kagamhanang lokal usab daw nanghunaw sa ilang kaakuhan sa pagtabang pagsulbad sa maong suliran. Na hala, sukad karon, ang problema sa kakulang tubig adto na nato ibasol sa VECO o di ba kaha sa mga Chinese nga ni-okupar karon sa mga isla sa West Philippine Sea. Lihay pa more!

Vendors, pagmata!

Mipasalig si Mayor Edgar Labella nga walay bisan usa ka vendor nga mabiyaan kon madayon unya ang laraw sa SM sa paghimo sa Carbon Market ngadto sa usa ka modernong tiyangge. Apan buot usab ang mga kahugpungan sa mga vendors nga apilon sila sa panagsabot tali sa SM ug sa kagamhanan. Kinahanglan gayod nga magpakabana ang mga vendors ug nga magmabinantayon sila sa panahon nga moarangkada na unya ang pagpalambo sa Carbon.  Kon wala’y pagpakabana, hayan mabiyaan gihapon bisan pa man sa pasalig sa Mayor. Na hala mga vendors, “PAGMATA”!

Lupig sila!

Miawhag ang Bureau of Fisheries and Aquatic Resources (BFAR) sa mga lokal nga mananagat nga adto na una sa layo’ng bahin sa kadagatan managat sa tuyo nga mapanalipdan una ang mga isda nga anaa makuha duol-duol sa lapyahan. Apan sayod usab kita nga sa halayong dapit sa kadagatan, atoa usab didto ang mga mananagat sa laing nasod. Niining maong awhag, sama ra nga nagpasiugda ang BFAR og tigi kon contest sa panagat ug ilang gipasalmot ang atong mga mananagat bisan pa man sa ilang kakulang sa himan ug teknolihiya. Matud pa sa usa ka radio station: “Lupig Sila”!