Pag-iyahay batok sa ASF
Gawas nga gipasanginlan nga wa mopahibawo sa hingpit nga kasayuran mahitungod sa pagsud na sa kagaw sa African Swine Fever (ASF) sa pipila ka bahin sa Luzon, gidudahan sab ang Department of Agriculture (DA) nga nitago sa gidudahan nga mga kaso sa ASF sa Pilipinas sukad pa niadtong Marso, o unom ka buwan ang nilabay.
Ang pasangil giluwatan sa United States Grains Council (USGC) Senior Director of Global Programs nga si Cary Sifferath. Kinsa nabalaka nga gisunod sa Pilipinas ang China sa pagtago sa kinatibuk-an nilang mga kaso sa ASF.
* * *
Dako ang kalainan sa paagi ni Agriculture Secretary William Dar sa pagduma sa krisis sa ASF sa Pilipinas kay sa Vietnam. Nga gihulagway sa USGC nga nibutyag dayon sa tanang kasayuran ngadto sa katawhan ug nihimo sa tukmang mga lakang pagpugong sa dugang pagkatap sa kagaw.
Mao say gihimo sa labing uwahing nasud nga natakdan sa ASF, ang South Korea: Gipahunong dayon ang paglihok sa tanang karneng baboy sa tibuok nasud sud sa 48 ka oras ug natultolan dayon ang tinubdan sa kagaw ug ang tanang dapit nga naapektahan.
* * *
Nahibawo na tang tanan unsay gihimo ni Dar: Gitagoan ang kasayuran nga positibo na ang Pilipinas sa ASF sud sa dul-an sa usa ka buwan di lang gikan sa katawhan kon dili gikan sab sa ubang mga sakop sa gabinete apil na ni Presidente Rodrigo Duterte.
Ang resulta? Kapin na sa buwan human ta nasudlan sa ASF mao pay pagtukod og task force batok sa ASF nga gipangulohan sa presidente ug naglakip sa mga sakop sa gabinete.
* * *
Unang gimbuhaton sa task force mao ang pakigtagbo sa mga gobernador ug mga mayor aron ilatid unsa ang labing tukma nga mga lakang sa pagtino nga di makakatap sa ubang bahin sa Pilipinas ang ASF sa Rizal ug Bulacan.
Apan hagbay ra ang mga gobernador ug mga mayor nga nag-iyahay sa pagpanalipod sa ilang mga lalawigan, dakbayan ug kalungsoran gikan sa ASF. Tungod sa haw-ang sa nasudnong liderato nagpatuyang ang lokal nga mga opisyal sa pagpatuman sa bisan unsa na lang nga mga lakang nga ilang nahunahunaan apil nang pipila nga nakadaot na hinuon sa industriya sa baboy.
* * *
- Latest
