Samsam manggiluy-on

Suwerte na kaayo ang mga ginikanan kon wala matakdi ang ilang anak sa super epidemic nga sakit, ang sakit sa pagkagumon sa gidiling drugas nga gipaka-ginoo sa atong kabatan-onan karon.

Higala kong Yaksbo, bag-o lang na-mild stroke, naproblema intawon sa kinamanghoran niyang anak, kinsa walay laing trabaho gawas sa pagsige’g suyop sa shabu. Kaantigo na kining mangilad aron lang may kuwarta nga ikapalit og shabu. Isog na kaayo, sige nagpanghasi, dili na moilag igsuon. Busa silang tanan nga naa sa ilang balay gikuyawan. Paita, sa?

Gipangutana ko si Yaksbo, nganong mao man kini gidangatan sa iyang anak nga siya si Yaksbo, buotan man? Nganong wala man kini maliwat sa nagligwat?

“Kuan man god, Boss Jav, patay na baya iyang Mama. Busa, wala na gyod mapadayon sa usa ka inahan ang mainampingong pag-agak sa bata. Samot na, nga ang akong trabaho panggabii. Panahon sa adlaw, tingkatulog. Busa, dili na nako masundan pirme ang dalan nga gisubay diha sa iyang pagtubo,” seryosong pahayag ni Yaksbo.

Ning maong hitabo, gipakita unsa diay ang gikinahanglan sa bata aron dili kini mahitumpawak ngadto sa daotang kalibotan? Dapat, ang makanunayong stewardship sa amahan ug asawa anaa mag-uban gyud pirme diha sa pagmatuto sa ilang anak.

Kinahanglan nga tudloan gyud kini og mga moral values sa kinabuhi. Ug labaw sa tanan giyahan sa pagsimba, pag-ampo ug pagpasunod sa mga sugo sa Diyos nga gihiusa lamang sa usa ka pulong – ‘Gugma.’ Kay sa higayon nga anaa siya niini, maiya sab ang kinaiya sa kamanggiluy-on ngadto sa iyang isigkatawo.

Sama sa talagsaong kinaiya nga gidalit ni Talisay City Mayor Gerald ‘Samsam’ V. Gullas Jr. niadtong usa ka PWD, Thelma Moneva, 40, kinsa  gikugos-dala didto sa City Hall aron pagkuha sa PWD cash assistance. Wala kapugngi ang kaluoy’ng gibati ni Samsam.

Dihadiha, mipagawas siya’g kinasingkasing pahibalo nga iya nang ipahatod sa balay sa PWD ang maong cash assistance aron dili na mahago. Usab, ang nahisgotang PWD giduaw niya sa balay ug gihatagag wheel chair nga magamit adlaw-adlaw.

Pastilan, Mayor Samsam, imo gyong gitandog ang kasingkasing namong mga kabos. Kaanindot unta kon ang imong kamanggiluy-on manakod sa uban, kinsa wala pa niining matanga sa kinaiya.