Wala pay aksiyon ang Land Transportation Office (LTO) sa awhag sa Cebu City Council nga dili nila basta-basta lang nga i-revoke ang mga lisensya niadtong mga driver nga madakpan nga makahimo og reckless driving sa ilang mga gimaneho nga sakyanan.
Matud ni Konsehal Lea Japson nga maoy miduso og resolusyon ngadto sa City Council kabahin niini, nga samtang usa lang ka prebeliheyo ang pag-angkon og lisensya sa pag-drive, apan dili kini kay basta-basta na lang nga i-revoke nga walay hearing nga ipahigayon.
Atong klaruhon nga sayop kadtong una nga mga balita nga gusto ni Konsehal Japson nga ipa-revoke gyud dayon ang mga lisensya sa mga driver nga masakpang nakahimo og reckless driving.
Ang reckless driving naglakip kun ang usa ka driver dili mopasiga sa iyang suga samtang magdagan ang sakyanan panahon sa gabii, ug daghan kaayo ni dinhi sa siyudad.
Ang laing mga reckless driving mao ang pagpugos gyud pagsulod sa mga No Entry nga karsada kay one-way ang traffic, ang No Right turn on red signal, ug ang pagpugos pag-Go sa eskina bisan og stop na ang signal light. Gitawag kini og DTS, kun disregarding traffic sign.
Ang gusto ni Konsehal Japson mao nga hatagan sab og higayon ang mga driver nga makadepensa sa ilang kaugalingon, sa dili pa i-revoke ang ilang mga lisensya.
* * *
Kuyaw na gyud karon nga panahona kay sak-on ka na sa imong balay ug patyon. Kagahapon, nakapanglingo-lingo ko nga naminaw sa report nga gisaka sa balay ang usa ka lumolupyo sa Naga.
Aw, hinoon, mora’g may atraso man ang maong tawo ug posible nga siya gipatay. Apan dili na gyud karon angay nga mokumpiyansa kay ang kapolisan dili na makaato pagbantay kanato.
Tiaw mo nga ang “police-to-population ratio” sa usa ka highly-urbanized city, sama sa Dakbayan sa Sugbo, usa ka polis sa matag 500 ka lumolupyo. Apan ang nahitabo karon, usa ka polis sa matag 1,500 ka lumolupyo dinhi sa siyudad.
Akong klaruhon nga ang pagbaton og armas, dili gyud kasiguroan nga dili ka mapatay, kun may motinguha gyud nga ikaw patyon.
Apan arang-arang na lang kay basin may higayon nga madepensahan nimo ang imong kaugalingon.
Apan mao lagi, pwerteng dakoa’g gasto sa paglegalisar paghupot og armas. Una, kinahanglan nga ang armas gikan sa legal nga baligyaanan, o kadtong lisensyado na.
Ang usa ka tawo kinahanglang mokuha og LTOPF, (License To Own and Possess Firearms; unya iparehistro ang armas ubos sa imong LTOPF, ug dayon mokuha ka og Permit to Carry Firearms Outside of Residence.
Abi ninyo og pila ang PTCFOR? Panguros na lang daan kun wala kay tinigum. P10 mil na.