Namalik ang mga vendor

Nagmaya ang tanan sa dihang gihawanan na gayud sa katapusan sa kagamhanan sa dakbayan sa Sugbo sa mga vendor ang mga nag-unang karsada sa downtown area, ilabina sa makasaysayon nga Colon Street.

Human sa maong operasyon nindot na gyud tuod lakwan ang mga karsada ug mga sidewalk. Ako mismo nalipay niini gumikan kay kada adlaw man ang akong magbaktas sa dowtown tungod na naa man nahimutang among opisina.

Apan unsa ban hitaboa nga human sa pipila ka adlaw mibalik man ang mga vendor sa mga karsada sa downtown. Sa Colon Street, mibalik na usab ang mga stall diha sa sidewalk nga nagbaligya og mga nagkalainlaing items.

Siguro tungod kay walay nag-monitor nga mga personnel gikan sa City Hall mao nang namalik ang mga vendor. Ug sa umaabot nga mga adlaw mapuno na usab ang mga sidewalk sa mga stalls sa nga nagkalainlaing baligya.

Maayo kaayo ang lakang sa kagamhanang lokal sa dakbayan. Apan ang dakong problema mao nga kulang sa paningkamot pagsustiner ang hingtundang mga ahensiya mao nang namalik kining maong mga vendor.

Kay kun kugi pa ang City Hall sa pag-monitor sa mga karsada ug sidewalk, wala untay higayon nga mamalik pa ang mga vendor ug nga padayon untang hapsay nga lakwan ang mga sidewalk.

Hinuon, una natong mabasol kini mismong mga vendor tungod sa ilang ka kulang sa disiplina. Gipapahawa na sila sa kagamhanan human sa pipila ka tuig nilang paghatag og kahasol sa sidewalk. Apan karon namalik na usab kining mga kanahan.

Angay lamang nga tinud-on sa City Hall ang paglimpiyo sa mga sidewalk sa downtown area. Kana kay nasugdan na kini sa lokal nga pangangmahanan, angay lamang nga hinungasgan pa kini alang sa tinud-anay nga kausaban.