Makadaot nga pagtak-om
Nahibaw-an sa kadagkoan sa Department of Agriculture (DA) niadtong Biyernes, Agosto 16, nga daghan ang nangamatay nga mga baboy sa Luzon. Naalarma ang mga opisyal sa Bureau of Animal Industry (BAI) kay mas daghan ang nangamatay (20 porsiyento) kay sa naandan nga 3 ngadto sa 5 porsiyento.
Apan wa magsaba silang Agriculture Secretary William Dar ug kaubanan. Wa sila mohatag og bisan unsang kasayuran sa publiko.
Bisan sa kahigayonan nga African Swine Fever (ASF) ang nakapatay sa mga baboy wa sila magtagad sa pagpahibawo unsay ilang gihimo human nadawat ang kasayuran.
* * *
Hangtod nga nipahibawo ang Taiwan niadtong Domingo, Agosto 18, sa ilang paghimo og duha ka makapakugang nga mga lakang:
• Gi-apil na nila ang Pilipinas sa ilang listahan sa mga nasud nga natakdan na sa ASF ug busa di na palitan og karneng baboy; ug
• Gipasidan-an ang mga mobiyahe gikan sa Pilipinas nga susihon nang ilang mga bagahe kun may sud ba nga mga karneng baboy, sama sa ilang mga bisita gikan sa Cambodia, China, Hong Kong, Laos, Macau, Mongolia, Myanmar, North ug South Korea, Russia, Thailand ug Vietnam.
* * *
Tungod sa pahibawo sa Taiwan, napugos si Dar sa pag-atubang sa mga sakop sa media niadtong Lunes, Agosto 19, aron sa pagpahibawo sa mosunod:
• Gisusi na sa mga laboratoryo sa sud ug gawas sa nasud ang blood samples sa nangamatay nga mga baboy ug ang resulta mahibaw-an sa mosunod nga duha ka semana ngadto sa tulo ka buwan; ug
• Gipamatay ug gipanglubong nang tanang baboy sud sa usa ka kilometro nga radius ug gilaming ang tanang baboy sud sa 10 ka kilometro nga radius.
* * *
Apan nagdumili si Dar paghatag og dugang detalye kay di ganahang ma-alarma ang katawhan kay wa pa matino ang ASF.
Mas abunda ang kasayuran sa Taiwan: Ang nangamatayng mga baboy nahimutang sa Rizal sa Calabarzon ug Bataan sa Central Luzon.
Bisan sa pagtak-om ni Dar nipahibawo ang munisipyo sa Rodriguez, Rizal nga 100 ka baboy ang nangamatay sa tulo nila ka barangay.
Hinaot nga maleksiyon ang tanang hingtungdan nga ang pagpakahilom mas makapa-alarma lang sa katawhan.
Gawas nga makapaduda nga nagduka sila sa katungdanan. O nisuway gyod pagtabon sa makadaot nga kasayuran.
* * *
- Latest
