Disiplina bay

Gipatawag ni Cebu City Mayor Edgardo Labella ang mga kapitan sa 80 niini ka Barangay niadtong milabay nga adlaw ug gihisgotan ang paglimpyo ug ang dili pagpasagad sa paglabay sa basura sa ilang mga dapit ilabi na gayod sa kasapaan.

Kini human mibantang sa mga mata sa mayor ug sa mga tawo nga miboluntaryo sa pagpanglimpyo sa kasapaan sa dakbayan sa Sugbo ang nagtapun-og nga mga basura nga bisan asa lang gipanglabay.

Sa tigum nga gipatawag sa Mayor iyang gisaaran og tag lima ka milyon ka pesos (P5M) ang tanang kapitan, makaalyado man niya o dili basta makalimpyo sa ilang Barangay.

Kining maong kantidad gigahin alang sa pagpalit og bag-ong mga garbage truck aron magamit sa paghakot sa mga basura.

Ang nahisgotang kantidad madawat sa mga barangay sa dili pa mapupos ang tuig 2019.

Gisaad usab sa Mayor nga iyang doblehon ang lima ka milyon ka pesos (P5M) sunod tuig kun makapakita og kalimpyo sa ilang Barangay ang mga opisyal niini. Gawas sa paghatag og kantidad sa salapi gibaharan usab niya ang mga kapitan nga manubag sa balaud kun ugaling dili nila mahimo ang ilang trabaho sa paglimpyo sa ilang barangay.

Akong sugyot, aron mahimong epektibo ang paglimpyo sa basura sa barangay, gikinahanglan nga ubanan og disiplina ug politikanhong kurso ang lima ka milyon ka pesos (P5M) nga ayuda nga madawat gikan sa kagamhanan sa dakbayan sa Sugbo.

Istriktohon ang pagpatuman sa balaud sa paghipos sa basura, pamultahon ug dili gayod pasayloon ang mga malapason.

Disiplinahon ug usbon ang pagtoo sa mga tawo nga responsibilidad sa mga opisyal sa gobyerno ang paglimpyo sa ilang mga basura.

Ipasabot sa katawhan nga ang trabaho sa gobiyerno mao lamang ang paghakot sa mga basura nga gilabay sa mga designated nga labayanan ug dili ang pagpanilhig sa ilang mga tugkaran.