Dayag nga hangtud karon wala pa hingpit madawat ni Congresswoman Paz Radaza sa lone district sa Lapu-Lapu nga dili na ang ilang pamilya maoy gamhanan sa dakbayan.
Tinuod nga lisud gyud ang pag-move on, dili lang sa sakit nga kasinatian sa gugma kun dili lakip na sa kaparotan sa politika.
Ang pag-insister ni Radaza nga magpabilin ang iyang buhatan sulod sa City Hall sa Lapu-Lapu bisan gihinginlan na sa bag-ong mayor nagpakita nga wala pa niya madawat ang kamatuoran nga dili na ang iyang pamilya maoy hari sa dakbayan.
Angayang dawaton ni Radaza ang kamatuoran nga nilabay na ang ilang panahon ug tumanon ang kamanduan ni Mayor Junard “Ahong” Chan nga ibakanti ang iyang buhatan sulod sa City Hall.
Ang Department of Interior and Local Government (DILG) miluwat na og opinyon nga nagsuporta sa katungod ni Chan nga hinginlan ang buhatan sa kongresista.
Apan si Radaza miinsister nga magpabilin tungod kay maoy iyang gisaligan ang ordinansa nga gipalabang kaniadto sa konseho nga naghatag og luna sa buhatan sa kongresista sulod sa City Hall. Kaniadto ni nga Radaza pa maoy mayor ug Radaza sab maoy kongresista. Lahi na ang sitwasyon karon.
Isip kanhi mayor, makasabot unta si Radaza nga katungod sa bag-ong mayor ang paghukom unsaon paggamit ang mga buhatan sulod sa City Hall. Kun gikinahanglan ni Chan ang luna nga giakupahan ni Radaza wala siyay mahimo gawas sa pagsunod sa kabubut-on sa mayor.
Ang mga kongresista dunay budget gikan sa Kongreso alang sa ilang tagsa-tagsa ka mga buhatan lakip na niini ang ilang mga district offices. Nganong dili gamiton ni Radaza ang maong budget pag-abang og luna?
Pinaagi sa pag-abang og luna nga mamahimo niyang buhatan, masulbad ni Radaza ang maong problema. Apan tungod sa politika mas gipili niya nga makigtigi ni Chan.
Daghan ang mga butang nga angayang hatagan ni Radaza sa iyang panahon inay nga magpasuwabi sa iyang pamolitika. Sayo pa alang sa sunod nga eleksiyon busa angayang trabaho maoy atubangon ni Radaza ug dili pamolitika.
Gawas sa balaudnon nga did-an na ang paggamit sa pangalan ni Lapulapu isip tawag sa isdang pugapo, unsa bay laing mas mahinungdanon ug mapuslanon nga nabuhat ni Radaza didto sa Kongreso?