Usa ako sa miuban sa nagkadakong bul-og sa katawhan nga wala mouyon sa lakang sa kagamhanan nga magdeklara og martial law didto sa Negros Oriental gumikan lagi sa nagkagusbat nga sitwasyon sa kahusay sa maong lalawigan.
Kini tungod lagi kay sa akong tan-aw, wala na kinahanglana sa administrasyon ni Rodrigo Duterte ang maong deklarasyon. Kaya kaayo sa atong kasundalohan ug kapolisan nga mabalik ang kahusay ug kalinaw sa Negros Oriental.
Sa niaging mga adlaw, gianusiyo sa Malakanyang nga hayan nga ideklara ni Duterte ang military rule sa maong probinsiya tungod sa nagsaka nga mga kaso sa pagpatay nga kadaghanan gibasol ngadto sa mga rebeldeng komunista.
Lakip sa mga biktima mao ang upat ka pulis kinsa giingon nga giatake sa mga sakop sa New People’s Army. Uban sa mga biktima sa pagpamusil mao ang usa ka kanhi mayor, konsehal, mga kapitan sa barangay ug lokal nga opisyal sa Department of Education.
Aron lagi pagsulbad sa seryosong problema sa kahusay ug kalinaw didto, morag dako gayud ang posibilidad nga madeklara ang martial law didto sa Negros Oriental. Gani nagpadala na og dugang puwersa ang kasundalohan batok sa mga dautang elemento didto.
Apan gikinahanglan ba gayud ang martial law sa maong lugar aron lamang masulbad ang problema sa mga pagtapay didto? Unsa na ba gayud ka seryoso ang sitwasyon nga mosangpot na man ang kagamhanan ngadto sa balaud militar?
Sa akong tan-aw, kaya kaayo sa kasundalohan ug kapolisan nga mamintenar ang kahusay ug kalinaw sa Negros Oriental nga dili mosandig sa martial law. Napamatud-an na kini kaniadto sa dihang agresibo pa ang otoridad sa ilang kampanya batok sa mga rebelde didto.
Ang problema man gud mao nga milurang ang pagka-agresibo sa militar ug kapolisan sa ilang kampanya batok sa mga rebelde didto mao nga nakahigayon usab sa ilang mga opensiba ang mga komunista. Maghatag lamang og dautang imahe ang martial law sa Negros Oriental. Kay basin unya kun yam-iran ang rehiyon sa mga mamumuhonan ug turista kinsa magdumili na hinuon pagbisita dinhi.