Usa sa labing kusganon nga pasidaan ni Presidente Rodrigo Duterte sa ika-upat niyang State of the Nation Address (SONA) niadtong Lunes gipahinungod sa mga kawatan sa iyang pamunoan. Iya silang gibuyboy, gitunglo, gipaka-uwawan, gi-binaboy og kasaba ug gihulga nga patyon.
Giawhag niya ang katawhan sa pagtamparos sa mga mangilkil nila, paggamit sa iyang ngan sa pagpahinumdom sa mga abusado sa di pagpahimus sa katungdanan ug sa paghimo og eskandalo aron nga iyang mahibaw-an ang binuang ug masilotan ang mga responsable.
* * *
Nataligam-an sa paghisgot sa presidente nga ang kasagaran sa gipasanginlan nga mga kawatan iya ra sang mga tinudlo. Sila ang gipahimutang niya sa labing mahinungdanon nga mga buhatan kay iyang mga suod, o nadestino sa Davao, o nakatabang sa iyang kampanya.
Una niyang gitudlo sa Bureau of Customs nalutsan og P6.4 bilyones nga shabu ug ang ikaduha nalutsan og P11 bilyones nga shabu.
Iyang gitudlo sa Department of Tourism nihatag og P60 milyones nga kontrata sa iyang igsuon. Inay silotan, ang unang duha gibalhin sa laing mga buhatan ug samtang gitangtang ang ikatulo gitudlo ang laing igsuon sa mahinungdanong katungdanan.
* * *
Way kalainan ang presidente sa tagduma sa bodegang naggusbat kay gibalik-balikan og lungkab nga nagsige og panumpa nga bantayan niya ang tanang sud nga katigayonan gikan sa tanang mahilabtanon sa tibuok niyang kinabuhi ug hangtod sa kataposang agas sa iyang dugo.
Apan ang iyang gitudlo nga mga tigbantay mao ang iyang mga paryente, higala, silingan ug nautangan og kabubut-on, sa way pagsusi sa ilang katakos ug kaligdong, nga utro sab diay nga mga kukhan ug tulisan.
* * *
Gitangtang sa presidente ang pipila sa iyang mga tinudlo nga iyang gipasanginlang nangawat. Apan way ebidensiyang gipakita ni kasong gipasaka. Gihatagan niya og mas dakong importansiya nga di mauwawan ang mga sakop sa pamilya sa iyang mga gipanangtang kay sa pagpanalipod sa nasudnong katigayonan.
Gipaka-ingon sa presidente nga mabadlong ang pangurakot kun magsige lang siya og estorya. Way kalainan sa pagsige og balik-balik nga lapad nga pinatyanay pangsulbad sa drugas.
Kaliboan nang nangamatay apan nagbaha gihapong drugas.
Ambot kanus-a pa makamatngon nga ang labing epektibong paagi pagsulbad sa suliran mao ang pag-ugkat sa gamot nga mga hinungdan.
* * *