Siyam ka kinabuhi ang nakalas diin kasagaran ang mga batang tinun-an sa nahitabong trahedya sa karsada didto sa lungsod sa Boljoon sa habagatang bahin sa lalawigan sa Sugbo.
Nahitabo kini niadtong Hulyo 19 samtang luwan sa usa ka dump truck nga nadisgrasya samtang nagbiyahe padung unta motambong sa district athletic meet.
Sa statement nga gipagawas sa Department of Education 39 ka mga tinun-an kauban ang pipila ka mga ginikanan ang nakasakay sa mini dump truck dihang nawad-an og break dayon kahulog sa pangpang.
Ang ubang mga survivors gidala sa nagkadaiyang tambalanan apil na sa dakbayan sa Sugbo ilabi na kadtong nagrabehan.
Ang pangutana kinsa man ang mabasol sa hitabo? nganong sa dump truck man intawon sila gipasakay? Kun nangayo og ayuda ang mga eskwelahan sa lokal nga kagamhanan wala na lang ba gyuy laing service vehicle nga pwedeng ipagamit?
Moingon sila nga naandan na nga gamiton ang dump truck ilabi na sa mga bukiran nga dapit apan, intawon mga bata ang kasagaran nga sakay dili mga bato o kahoy nga maoy ikarga sa dump truck.
Unta kun gitan-aw dili lang sa LGU kon dili apil na sa mga nagdumala sa eskwelahan ang safety sa mga tinun-an dili mahitabo ang disgrasya.
Murag desperado na kaayo ang school management nga mosalmot sa district meet unya wala nila tan-awa ang safety sa ilang mga tinun-an, unsay tan-aw nila sa mga bata kargamento o basura nga walay kinabuhi nga i marka bahala nalang unsay dangatan?
Sakit alang sa mga ginikanan nga mahitabo ang naasoyng trahedya, tungod lagi usab kay gusto sa mga ginikanan nga makaapil ang mga anak sa mga school activities mosanong nalang sab unsay gusto sa eskwelahan.
Daghan nang nahitabo nga sama niini, field trip, educational tour bla.. bla ..bla ..nga pasiugdahan sa mga eskwelahan apan mosangpot sa trahedya.
Gikinahanglan ba gyud ang ingon niini nga kalihokan alang sa pag-umol sa kinaadman sa mga bata? matod pa nga alang sa personality development ug social enhancement sa mga bata ang ingon niini nga kalihokan.
Apan para nako wala kini kapuslanan naghatag lang og peligro sa kinabuhi sa mga bata.
Dili sa pagpanganti ug pag-inarte isip usa ka amahan dili gyud ko mosugot nga mouban ang akong mga anak sa mga suroy suroy o educational tour kay dili nako isugal ang ilang kinabuhi, bahala na og walay points akong anak sa pag laag laag.
Naa pay papirmahon og waiver ang mga ginikanan kon unsay mahitabo dili sila manginlabot, angayan nga mga ginikanan maoy mopapirma sa mga tagdumala sa eskwelahan tungod kay sila man ang responsable niining mga kalihokan.
Sa panahon nako sa probinsya sa una ang mga school activities sulod ra man sa among school campus, wala man gyud ko nakasuway nga niapil og tour tour bisan asa.
Nganong na-develop man lagi akong personalidad? Depende ra gyud kana sa paningkamot sa usa’g usa uban ang giya sa mga ginikanan ug magtutudlo mamahimong mapuslanong molupyo ang usa ka bata inig dako na niini.
Tan-awon nga ang safety sa kabataan ang segurohon dili ang interest sa eskwelahan.