EDITORYAL - Pagkubos sa ekonomiya

Unsa may rason kun nganong niubos man ang pagsaka sa gross domestic product (GDP) sa Pilipinas nga kinahanglang tanawon sab unta ni Presidente Rodrigo Duterte.

Mao ba kini ang usa sa mga hinungdan kun nganong nagkaubos ang pagtubo sa ekonomiya sa nasud karon mao nga daghan ang nawad-an og trabaho ug nisaka sab ang inflation rate sa Pilipinas?

Sa report  sa Philstar.com, sa gihimong forum sa University of the Philippines Center for Integrative and Development Studies ang mga economists nibutyag nga naalarma na sila karon sa wala paghatag og  atensyon sa gobiyerno sa kapakyas niini pagkab-ot sa target unta nga 7-8 GDP. Ang GDP mao ang kinatibuk-ang presyo sa tanang produkto ug mga serbisyo nga nahimo dinhi sa sud sa Pilipinas sa usa ka panahon. Sa maong forum, si Professor Emmanuel de Dios sa UP School of Economics miingon nga nagsugod pagkubos ang GDP sa nasud paglingkod ni Duterte.

Gikan sa 6.8 percent niadtong tuig 2016, 6.7 percent sa 2017 ug 6.2 percent sa 2018, ug niining lang 2019 sa unang upat ka buwan 5.6 percent nalang ang GDP sa Pilipinas, mao nga naalarma na sila.

Matud pa sa report, si Bangko Sentral ng Pilipinas Governor Benjamin Diokno miingon nga dili lisod paabton og 8 percent ang GDP. Tingali tungod kay unang upat pa man ka buwan.

Kining pagkubos sa GDP sa Pilipinas kinahanglang masusi dayon sa mga sinaligan sa ekonomiya sa presidente tungod kay sa kadugayan modako unya ang gintang tali sa mga adunahan, middle class ug mga kabus nga nagsalig lamang sa lokal nga ekonomiya.

Kinahanglang maghimo sila’g mga palisiya ug programang dili lamang ang mga dato o middle class maoy mabulahan kondili hasta gyud unta ang mga kabus ilabi kadtong mga maguuma ug mga mananagat.

Ang administrasyong Duterte namuhonan og maayo sa “build, build, build program” niini nga giingong makapasaka ug makapapaspas unya sa ekonomiya sa nasud kun makompleto. Maayo kining atangan.