Law enforcer, law breaker

Sa unang adlaw pa lang paglingkod isip bag-ong amahan sa Talisay City, gipadayag na ni Mayor Gerald ‘Samsam’ V. Gullas Jr. ngadto sa tanang empleyado sa city hall, nga motabang niya paghatod ngadto sa katawhan og makugihon, matinud-anong serbisyo.

Gikan sa mga kawani nga naa sulod sa mabugnaw’ng opisina, hangtod sa mga nakaunipormeng magbalantay sa kalinaw nga anaa madestino sa mainit nga kadalanan, iyang gihangyo nga unta buligan ang bag-ong misidlak nga mayor pagtuman sa unsay gusto niyang ipatagamtam sa mga taga Talisaynon – ang katam-is nga bunga sa matul-id ug diniyos nilang pagpangalagad.

Usa sa gipanghingusgan sa mayor sa pagpatuman mao ang ‘No helmet, No driving policy’. Gimandoan niya ang City of Talisay-Traffic Operation Development Authority (CT-TODA) nga himoon kini sa daling panahon.

Busa, gisugdan dayon sa mga tinugyanan sa balaod ang hugtanong pag-implementar niadtong Hulyo 9, Martes, diin kapin kun kulang, 30 ka mga badlongon ang nangadakpan ug na-impound ilang mga motorsiklo.

Dalaygon ang daling pagsanong sa taga CT-TODA sa sugo ni Mayor Samsam. Apan nalum-it ang nawong sa usa ka concerned citizen dihang nakit-an ang usa sa mga traffic enforcer nga nagsakay sa motor nga wala magsul-ob og helmet, kinsa giasayin pa ra ba gyud isip inspector sugod alas 6:00 sa buntag hangtod alas 2:00 sa hapon.

Malas ang maong enforcer kay nakuhaag hulagway sa concerned citizen, kinsa misumiter-pasa niini ngadtong Mayor Samsam nga miduso sab ini ngadto sa CT-TODA for immediate action.

Nangatarongan ang enforcer nga nakalimot kuno siya nga petsa 9 sa Hulyo ang maong adlaw, ang pagsugod og implementar sa ‘No helmet, No driving policy. Hinungdan, nga nakalimot pud siya pagdala sa iyang helmet.

Apan ignorance of the law excuses no one. Labi nag ang nakahimo sa salaod, usa ka law enforcer, kinsa imbes lunod-patayng motuman ug mopatuman sa balaod, mao na hinuoy nag-una-una sa pagsupak niini.

Busa, gidakop gyud siya sa iya ra pong kaubanan sa CT-TODA, giisyuhan og citation ticket ug nakabayad gyud kuno og P500. Dinhi, ning pagpangamahan ni Mayor Samsam, nalimpiyohan ang hagbay rang nagkahugawng timbangan sa hustisya ning atong nasod.  Ang iyang balaod patas, walay pili. Kay bisag polis, basta nakasala, hala, dakop!