Philippine Institute for Aging

Ato na kining nahisgutan dinhi sa una natong mga lindog. Apan tungod kay aduna kitay mga bag-ong napili nga sakop sa Kongreso, maoy atong panghinaut nga ila kining kahatagan og pagtagad  ug dili matalagam-an, dili malubong sa kalimot sama sa nahitabo sa unang mga Kongreso.

I’m referring here sa balaudnon nga gipasaka ni kanhi Senador Edgardo Angara, ang Senate Bill No. 2982 kon Philippine Institute for Aging. Nindot kaayong paminawon. Apan, wa man ni tagda sa kauban niyang mga Senador, kay perhaps alang kanila, kinsa man nang mga senior citizens? Daghan ba na sila? Maka-influence ba ang ilang gidaghanon sa resulta sa eleksyon?

Sa ato nang gibalikbalik dinhi, ilang tan-aw nato, mga individual persons lamang kita, diin usa ka potent group nga inig-tingog niini, mapugos ang Kongreso pagsanong ug pagpaminaw sa atong tingog.

Tiaw moy mopalanog sa hiniusa ug hinugpong nga tingog ang  kapin sa 8 milyones nga senior citizen sa tibuok nasud ... di kaha sila makugang ug mabungol niini? Sa ako nang giingon dinhi, kon magkahiusa lamang kita, ug magkasinabot, makapadaug kita’g Presidente sa nasud.

Imagine, 8 million senior citizens multiply by just 5 members of the citizens’ household, pila na ni ka number of votes? Apan tungod lagi kay imposible mang hiusahon kitang mga Pinoy, ambut ngano, ang individual natong mga tingog dili madunggan, kun madunggan man, ila dayon kining i-take for granted. Ipabale-wala lang.

Di man gani ta ka padaug og tulo ka senior citizen party-list representative ngadto sa House of Representatives nga wala magkinahanglan og samang number of votes sa ubang mga national candidates.

Ambut unsay  nahitabo sa FSCAP kon Federation of Senior Citizen Associations of the Philippines? Sa akong nahinumdoman, medyo naaktibo kita dinhi sa Sugbo sa dihang na-national president si Engr. Dodo Abella sa FSCAP.

Tapus sa iyang term, wala na igdungog ug wala na maglihok ang FSCAP. Ug napakyas usab kini pag-federate ug paghiusa sa tanang senior citizen association sa tibuok nasud. Busa, nagpadayon kitang nag-iyahay ug nag-idya-dya kita sa atong mga kalihokan. Beside, as a national organization, wala kitay nakita nga nahimo niini ngadto sa mga member associations niini.

Tuyo sa balaudnon ni Angara nga Philippine Institute for Aging: “ To  generate science and research-based solutions to guide policy-making on the social, legal, economic, and physiological issues surrounding aging.”

Nindot gyud kaayo. Apan, wa kini makadani sa mga pagtagad sa kauban niyang mga Senador, kaylagi, alang kanila, kinsa man ning mga senior citizen?  In terms of votes, wala silay mapaabot gikan sa individual nga mga senior citizens. Kon nahimo na unta nga Balaud ang SB 2982, ang Institute mao na untay muatubang ug mosagubang sa tanang kahingawa ug kabalaka sa mga senior citizens, ma-social, legal, economic, ug physiological man nga mga concerns.

Ug lagmit mao pa tingali unta kini ang makapahiusa natong tanang senior citizens sa tibuok nasud.  Nahinumdom ba kaha niini ang ubang mga Senador, sama ni Senador Sonny Angara? Lagmit ako ra man tingaling usa ang nahinumdom niini. Kinsa kaha karon nga mga Senador ang mobanhaw ug mo-refile niini didto sa Senado? I doubt!