Tatak Gwen

Sa unang adlaw sa pagbalik sa katungdanan ni Cebu Governor Gwendolyn Garcia walay lipud-lipod niyang gisilsil sa alimpatakan sa mga kawani ang genuine service ngadto sa mga Sugboanon.

Gigisa ug gigaling niya ang tanang mga department heads sa mga programa ug mga proyekto nga gipatuman kon nahaigo ba gyud kini sa ensaktong tumong.

Dayag kaayong gipangandaman sa gobernadora ang iyang pagsukit sukit sa mga department heads, stock knowledge ug well researched nga pangutana ang iyang gigamit sa dihang gigisa niya ang mga opisyal.

Kadtong wala maghimo sa ilang homework pastilan nangapusnga sa pagtubag tungod kay ihilam-os man gyud og balik sa gobernador ang sipyat nila.

Wala modawat og generic answer si Garcia tungod kay gusto niining masayran ang tinooray nga estado sa usa ka programa.

Labaw pa sa oral defense sa thesis ang nahitabo sulod sa Capitol Social Hall dihang gitagsa tagsa sa paggaling og pangutana sa gubernadora ang mga department heads.

Nadamay ang mga regional directors sa tanang ahensya sa kagamhanan nga mitambong sa unang tigom.

Kini nunot sa mga programa sa mga government agencies nga nakaapekto usab sa kinabuhi ug panginabuhi sa mga molopyo sa lalawigan sa Sugbo.

Kadtong mga ahensya nga ang programa maayo lang basahon sa papel apan palpak kuno sa implementasyon napusnga usab dihang gibaraw sa gubernadora.

Sa pintok ug well researched nga pangutana daw ginerbyus ang nangaigo nga nagkabunga bunga sa pagtubag.

What you see is what you get, mao kini si Gwen kun masuko ug madismaya iya gyud kining ipakita bisan unsa pay bation wala silay pakialam, sa laktod nga pagkasulti dili plastic ang gubernadora.

Mohulagway ang uban nga maldita si Governor Garcia, tinood gyud apan bentaha kini tungod kay magkinto man kadtong mga badlongon nga mohimo sa ilang mga kwestyonableng kalihokan kay dili man gyud sila santohon.

Si Gwen ang labing unang babayeng gobernador sa lalawigan ug siya usab ang unang babaye nga nakabalik sa renda sa pangagamhanan human niya buntoga ang kaatbang sa miaging eleksyon.

Nahimo siyang unang babayeng Sugboanon nga deputy speaker sa House of Representative.

Dili usab basta nga hagit ang iyang nahiaguman, nasuspendo siya kaniadto apan wala niya i-give up ang Kapitolyo sulod sa kapin 40 ka adlaw bisan og giputlan na og kuryente ug tubig ang governor’s office hangtod gipadlak na gyud ang Kapitolyo.

Kinsay magdahum nga makabalik pa siya sa Kapitolyo? Destiny?

Dili seguro kon dili ang determinasyon niya nga mobangon, mubarog ug buntogon ang mapait nga hagit nga iyang nasinatian.  Kini ang Tatak Gwen Garcia!