Thurman hangin, Pacquiao tubig
JAV BANATI - Javier Yntig Tapulado (Banat) - July 1, 2019 - 12:00am

Mitukar na sab ang naghaguros nga pagkahangin ni Keith Thurman, kinsa mipasiatab nga sayon ra kuno niyang pildehon ang una ug nag-inusarang 8th-division world titles champion Emmanuel ‘Manny’ Pacquiao sa ilang panagharong ibabaw sa ring didto sa Las Vegas, Nevada sa Hulyo 20.

Matud pang Keith, sa unang rawon pa lamang, patikangkangon na niya si Manny. Kon sa maong rawon makaipsot ang pastor nga senador, sa ikaduha, iya gyod kining TKO-hon. 

Gani, miplastada siyag $10,000 aron isugal niadtong mokontra nga dili na niya paabton ang payit nilang Manny og third round. Kuyawa diayg kumo niining tawhana, no?

Nakita man god ni Thurman nga nakabentaha siyag dako sa height, kusog, kapaspas sa kumo ug sa edad, diin siya 30 anyos pa ug wa pa katilaw’g pilde, samtang si Pacquiao 40 anyos na.

Si Keith naa pa sa iyang pinaka-peak sa iyang boxing career, kumparar sa kang Manny nga milabay na.

Apan di angayng mokompiyansa si Thurman. Kay ‘life begins at 40.’ 

Mi-react si Hall of Fame trainer Freddie Roach, kinsa mitabang pag-andam sa  pagpalig-on sa kahimtang ni Manny ning nagsingabot nilang away nga ipasalida sa Fox pay-per-view.

Dihang gipangutana si Roach sa usa ka boxing reporter kon nasuko ba kuno si Manny sa gibuhiang mga sakit nga panghambog ni Thurman, si Roach mitubag:

“The fire is there. I love when fighters talk about Manny because Manny takes it to heart. And he’ll make him pay for it.

At the press conference, Thurman said a few things about Manny and Manny let it go.”

Sanglit si Roach natandog sa gipangyawit ni Thurman, midugang siya pag-ingon: “We’re gonna knock you out”, sa pamasin nga mosuporta si Manny sa gibahad ni Roach ngadto sa hambogerong kaparang.

Apan wala na motubay si Manny. Kay kon si Thurman hanging mokusokuso, si Pacquiao nagpabiling tubig diha sa pagpamilig mga bugnawng pulong nga dili makapasakit sa iyang isig ka tawo.

Busa, kon hasmagan man siya mga nagpungasing puthawng suntok ni Thurman ning umaabot nilang payit, dili gyod sakitan si Manny.

Kay tubig man siyang mopabugnaw sa kainit ni Thurman hangtod malumos-mahugno kini ibabaw sa kanbas. 

THURMAN
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with