Kapa ilad, daghang nagpailad

Grabe atong gobiyerno. Bisag unsang matanga na lang sa buhis ang gipanday sa Kongreso ug Senado aron makakolektag dinagkong buhis sa nagtrabaho ug nagnegosyong kapitalista. Resulta, mosamot kamahal ang presyo sa mga palaliton, diin kitang kunsomidor ang maalaot.

Mao nga mga dato mosamot kaadunahan. Samtang ang mga pobre, mosamot ka pordoy.

May single parents nga tungod sa kawad-on, ang kaanindot sa ilang lawas ug ang katahom sa panagway maoy gihimong puhonan aron ang halin sa ilang nagubang dungog,  maoy ipakaon sa ilang anak.

Mga pamilyadong janitor, dihang gipakita nila nako ilang payslip, sagad, P4,000 ray madawat kada kinsenas. Paigo kaha ni?

Taga banko, pila poy ilaha? P11,700 ang  bulan.  Mga nars: P8,000-P12,000. Paita, sa?

Walay nadato sa panrabaho. Hinungdan, nagbaha ang nagnegosyog shabu.

Nagpunsisok ang namalit og numero sa jueteng ug suertes, nangayawat nga basig  makadaog, bisag nasayod nga ang maong mga ilegal nga sugal may tikas.

Ingon ini sab ang nahitabo sa libolibong nagpamiyembro sa Kabos Padatoon (Kapa) Community Ministry International, Inc. Bisan sila nasayod nga ang gi-invest nilang kuwarta gibunyagan og ‘donation’ samtang ang 30% interest nga madawat kada bulan gianggaag ‘blessing’, usa ka dakong ilad, sila misugal gihapon. Labi na, kay kadtong mga nahauna misugilon nga nahamugaway ang ilang panginabuhi gumikan sa Kapa. Kuno!

Bisag gianunsiyo ni Pres. Rodrigo Duterte nga ang gibuhat ni Pastor Joel Apolinario, ilang Kapa leader, usa ka dakong scam o pangilad, liboan ka miyembro ang nagpadayon pagprotesta ngadtong Duterte nga pabuksag balik ang tanang Kapa outlet nga iyang gipasira.

Bisan ako, mituo man nga kining Kapa, usa ka dakong pagpangilad nga negosyo. Apan daghan gihapon ang nagpailad. Ngano?  Tungod kay ang atong gobiyerno, sukad pa sa nangagi natong presidente ug hangtod karon, maayo lang mangolektag buhis sa katawhan. Apan pakyas paghatag og 30% interest nga kaayohan balik ngadto sa tanang lumolupyo nga nanginahanglan. Samtang si Apolinario gisayonsayon lang ang paghatag sa iyang gisaad nga pagbalik sa 30% interest love gift from the individual invested amount matag bulan ngadto sa tanang Kapa members.

Unya, kaya kaha ni sa atong gobiyerno? Mao nga di ko kamahay nila, kinsa bisag may ideya na nga ang Kapa ilad, nagpailad lang gihapon.