Mga oportunista

Wala pa gani makaasumir ang administrasyon ni Cebu City mayor-elect Edgardo Labella, tulin pa sa alas kwatro kining pipila ka miyembro sa pikas kampo nga makapadayag sa ilang suporta sa iya unya nga pangagamhanan.

Nag-una niining mga taga Bando Osmeña Pundok Kauswagan nga mipadayag sa iyang suporta ngadto sa bag-o nga administrasyon mao si Konsehal Jerry Guardo, kinsa ilado na sa pagbalhinbalhin og partido.

Matud pang Guardo atol sa usa ka press conference, andam siyang mosuporta sa mga programa ug proyekto unya ni Labella. Hinuon consistent kuno siya sa pagsuporta sa lokal nga pangagamhanan bisan kun kinsa pa ang mayor.

Kaniadtong tua pa sa Team Rama si Guardo, kalit lang kining milukso gikan maong partido ug mitapo sa BOPK sa administrasyon ni Tomas Osmeña. Karon, iya na usab nga gisurikbot ang oporturnidad pag-ambak ngadto sa kampo ni Labella.

Hinuon dili na ikatingala pa ang mga political butterflies dinhi sa nasud. Sukad pa man sa una, daghang pulitiko ang hilig kaayong moambak ngadto sa partido sa mayoridad, ilabina kun nagkupot kini sa renda sa pangagamhanan.

Gitugot kini sa atong Konstitusyon gumikan lagi kay ania man kita mihangop sa demokratikanhong klase sa pangagamhanan. May katungod ang bisan kinsa nga motapo ngadto sa usa ka partido nga susama niya og politikanhong baruganan.

Apan, sa laing bahin, dili usab maayo kining magpalingpaling og baruganan. Ang impresyon sa publiko mao nga morag walay dugokan na hinuon kining usa mga pulitiko tungod sa ilang pagkaputi og sampot sa sige og balhin og partido.

Mao kini sila ang gitawag og mga political opportunist. Kun asa kadtong maayong oportunidad nga ikaayo sa ilang politikanhong career, atua sab sila magpahipi.

Mora ba og mga iro nga kun asa ang bukag atua usab sila magyampungad.