Grabeng basura sa dakbayan

Ang suliran sa basura ang usa sa unang tutokan sa paglingkod na unya ni incoming Mayor Edgardo Labella.

Sa among one on one interview niadtong nakalabay’ng semana admitido si Labella nga dili tiaw-tiaw ang problema sa basura sa dakbayan.

Gani nahisgotan niya ang kasapaan ug kadagatan nga nanglutaw na ang mga basura. Labaw sa tanan ang mga basura nga matigom sa kada tawo nga nagpuyo  sa dakbayan aa Sugbo.

Tataw kaayo ang problema sa basura, gani sa agianan lang padung sa kompanyang akong gialagaran sa GMA Complex nahimo nang mini dumpsite kaniadto ang daplin sa karsada, maayo nalang kay naaksyonan sa baranggay Apas og nakuha ang mga basura.

Apan naa gihapoy nga tawon gahi og ulo nga molabay gihapon sa ilang hugaw kon walay makakita.

Tungod kay dili naman makalabay sa Inayawan landfil, naay dakong kahayag unta sa pagabli sa Material Recovery Facility- Sanitary Landfill sa barangay Binaliw.

Hulyo 1 ang gikatakdang opisyal nga pagbukas sa waste facility apan nauna una kini dihang nasirahan ang landfill didto sa Consolacion human nakasinati og landslide.

Karon pa lang nameligro na ang kapalaran sa private waste facility tungod sa teknikalidad nga gipasibaw karon sa umaabot Labella administration.

Matud sa incoming mayor nga ipatan-aw nila ang legalidad sa naasoy’ng proyekto sanglit wala moagi sa zoning board.

Kun siya kuno ang pag but-on dili gyud unta haum ang Baranggay Binaliw tungod kay usa kini ka agricultural land.

Hinuon matud ni Labella nga bukas siya sa pagpaminaw sa habig sa ARN Waste Management.

Una nang gipaniguro sa tagdumala sa waste facility nga misubat sila sa lagda pinaasubay sa nalatid sa Environmental Compliance Certificate.

Gani gamit nila ang advance technology alang sa main goal nilang waste to energy project inig ka human sa pagmontar sa mga state of the art nga kahimanan.

Kun dili man sa kalibutan, kini ang nag unang waste facility sa nasod nga modernong sistema ang gigamit.

Personal nakong nakita ang landfill, anaa kini mahamutang sa isolated area nga gipatung-an sa bukid ug distansya ra residential area.

Gani inig sulod nimo sa facility murag exclusive subdivision ka padung tungod sa hapsay nga sestema nga gipatuman.

Ang baho dili sad kaayo masimhotan tungod kay sundon man dayon og spray sa neutralizing agent.

Pero gikina-hanglan gyud usab masusi ang tanan base sa gusto sa bagong mayor aron dunay kasigurohan.

Apan unta dili kini masakyan og politika tungod kay ang tibook dakbayan ang mangalisbo sa kabaho kun dunay mahitabo nga dili pagsinabtanay kay nasagolan na sa mga kaugalingong interest.

Sa hiyas ni Labella, mopatigbabaw gyud kon unsa ang angayan nga ipatuman nga alang sa kabulahanan sa tanan.